ایرانی سفیر کا پاکستان کی حکومت، فوج اور عوام سے اظہار تشکر

ایران کے پاکستان میں سفیر رضا امیری مقدم نے ایرانی وفد کے حالیہ دورہ پاکستان کے دوران تعاون اور حمایت پر پاکستان کی حکومت، مسلح افواج اور عوام کا تہہ دل سے شکریہ ادا کیا ہے۔ یہ وفد وزیر خارجہ عباس عراقچی کی قیادت میں پاکستان آیا تھا۔

اپنے بیان میں ایرانی سفیر نے کہا کہ اس علاقائی سفارتی دورے کا مقصد دوطرفہ تعلقات کا جائزہ لینا اور خطے کی اہم پیش رفت پر مشاورت کرنا تھا۔

انہوں نے وزیر اعظم شہباز شریف اور فیلڈ مارشل عاصم منیر کی خاص طور پر تعریف کرتے ہوئے کہا کہ انہوں نے خطے میں امن اور استحکام کے فروغ میں اہم کردار ادا کیا۔

ایرانی سفیر نے کہا کہ یہ دورہ مکمل طور پر محفوظ اور پرامن ماحول میں مکمل ہوا، جس کا کریڈٹ پاکستان کی مؤثر منصوبہ بندی، انتظامی صلاحیت اور عملدرآمد کو جاتا ہے۔

انہوں نے مسلح افواج، سیکیورٹی اداروں، پولیس اور مختلف اداروں کے حکام کا بھی شکریہ ادا کیا جنہوں نے بہترین انتظامات کو یقینی بنایا۔

مزید برآں، انہوں نے پاکستانی عوام، خصوصاً اسلام آباد کے شہریوں کی مہمان نوازی، صبر اور تعاون کو سراہا۔

آخر میں انہوں نے پاک ایران تعلقات کو سراہتے ہوئے کہا کہ یران پاکستان دوستی زندہ باد۔

کاپی رائٹ بزنس ریکارڈر، 2026