خیبر پختونخوا میں امن کیلئے وفاقی و صوبائی تعاون لازمی ہے، وزیراعظم

وزیراعظم شہبازشریف اور خیبر پختونخوا کے وزیراعلیٰ سہیل آفریدی کے درمیان ملاقات ہوئی جس میں قومی سلامتی اور علاقائی ترقی کے حوالے سے وفاقی اور صوبائی حکمت عملیوں کو ہم آہنگ کرنے پر تبادلہ خیال کیا گیا۔

وزیراعظم آفس سے جاری کردہ ہینڈ آؤٹ کے مطابق اس اہم ملاقات کے دوران وزیراعظم نے امن و امان کی بحالی کے لیے وفاق اور صوبے کے درمیان شراکت داری کو ناگزیر قرار دیا۔ انہوں نے صوبائی حکومت پر زور دیا کہ وہ دہشت گردی کے خلاف اپنی کوششیں تیز کرے اور امن کے قیام کیلئے مقامی سیکیورٹی اداروں کو مضبوط بنائے۔

وزیراعظم آفس کے مطابق وزیراعظم شہباز شریف نے اس عزم کا اعادہ کیا کہ وفاقی اور صوبائی حکومتیں دہشت گردی کے مکمل خاتمے کے لیے مشترکہ کوششیں جاری رکھیں گی۔ انہوں نے اس بات پر زور دیا کہ صوبائی حکومت کو عوامی بہبود اور سیکیورٹی کے حوالے سے اپنی آئینی ذمہ داری پوری کرنی چاہیے۔

وزیراعظم نے اس بات کو تسلیم کرتے ہوئے کہ صوبائی حکومت بااختیار ہے، اس بات پر زور دیا کہ عوام کی صحت اور تعلیم کے لیے ٹھوس اقدامات کیے جانے چاہئیں۔

انہوں نے اس عزم کا اعادہ کیا کہ وفاقی حکومت خیبر پختونخوا کی بہتری کے لیے ہمیشہ پُرعزم رہی ہے۔اس موقع پر انہوں نے صوبے کو وفاق کا ایک لازمی حصہ قرار دیا ۔

مزید برآں وزیراعظم نے اس بات پر روشنی ڈالی کہ قومی ترقی اور عوامی خدمت کے لیے وفاق اور صوبوں کے درمیان قریبی ہم آہنگی اور موثر رابطہ کاری ناگزیر ہے۔ انہوں نے یقین دہانی کرائی کہ صوبے میں ترقیاتی منصوبوں، بنیادی ڈھانچے کی بہتری، اور تعلیم، صحت اور روزگار کے مواقع کے فروغ کے لیے وفاقی حکومت اپنی حدود کے اندر مکمل تعاون فراہم کرے گی۔
شہباز شریف نے کہا کہ وفاقی حکومت یکساں ترقی کے وژن پر عمل پیرا ہے اور قومی یکجہتی، استحکام اور خوشحالی کے اہداف باہمی مشاورت اور تعاون کے ذریعے مؤثر طریقے سے حاصل کیے جا سکتے ہیں۔