کسٹمز انفورسمنٹ کوئٹہ کی کارروائی، 51 کروڑ 53 لاکھ روپے مالیت کا اسمگل شدہ سامان اور منشیات ضبط

وفاقی بورڈ آف ریونیو (ایف بی آر) کے مطابق کسٹمز انفورسمنٹ کوئٹہ نے ہفتے کے روز ایک بیان میں کہا ہے کہ مستونگ اور مانیخوا کے علاقوں میں انٹیلی جنس پر مبنی متعدد کارروائیوں ( آئی بی اوز) کے دوران 51 کروڑ 53 لاکھ روپے مالیت کا اسمگل شدہ سامان اور بڑی مقدار میں منشیات ضبط کی گئی ہے۔

بیان کے مطابق برآمد شدہ کنسائنمنٹس میں غیر ملکی ساختہ منشیات (چرس)، چائنا سالٹ، سگریٹس اور مختلف الیکٹرانک اشیا شامل تھیں۔

ایف بی آر کے مطابق کسٹمز انفورسمنٹ کوئٹہ نے کہا ہے کہ ” غیر قانونی اشیاء ضبط کرنے کی یہ کارروائیاں معتبر انٹیلی جنس کی بنیاد پر کی گئیں، جو کسٹمز انفورسمنٹ کوئٹہ کی فعال کارکردگی پر مبنی حکمت عملی کی عکاسی کرتی ہیں۔“

انہوں نے مزید کہا کہ ” یہ کارروائیاں پاکستان کسٹمز کے اسمگلنگ روکنے، غیر قانونی تجارت کے خلاف اقدامات کرنے اور قومی معیشت کے تحفظ کے عزم کو اجاگر کرتی ہیں۔ بلوچستان کی قانون نافذ کرنے والی ایجنسیوں کی بروقت معاونت اور موثر ہم آہنگی نے ان کارروائیوں کی کامیاب انجام دہی میں اہم کردار ادا کیا۔“

اسی دن جاری ایک اور بیان میں ایف بی آر نے بتایا کہ جناح انٹرنیشنل ایئرپورٹ ( جے آئی اے پی )، کراچی پر پاکستان کسٹمز نے بین الاقوامی روانگی کے ٹرمینل پر مسافروں کی کلیئرنس کے دوران سونے اور غیر اعلان شدہ غیر ملکی کرنسی کی دو علیحدہ اسمگلنگ کی کوششیں ناکام بنائیں۔

کل دس ایس ٹی بی سونے کی بارز/بیلینز وزن 100 تولہ اور غیر ملکی کرنسی $11,900 ضبط کی گئی۔ ایف بی آر کے مطابق دونوں کیسز کی مشترکہ مالیت تقریباً 5 کروڑ 68 لاکھ 20 ہزار روپے بنتی ہے۔