سونے کی قیمت میں کمی، ڈالر مستحکم، سرمایہ کار امریکی شرح سود کے مستقبل کے حوالے سے محتاط

سونے کی قیمتیں پیر کو مسلسل تیسرے سیشن میں گر گئیں کیونکہ ڈالر چھ ماہ کی بلند ترین سطح کے قریب مستحکم رہا اور سرمایہ کار امریکی شرح سود کے مستقبل کے رجحان کے حوالے سے مزید وضاحت کے منتظر دکھائی دیے۔

اسپاٹ گولڈ 0.4 فیصد کی کمی کے ساتھ 4,045.58 ڈالر فی اونس پر جاپہنچا۔

امریکی گولڈ فیوچرز (دسمبر ڈلیوری) میں 0.9 فیصد کمی کے ساتھ 4,042.50 ڈالر فی اونس ریکارڈ کی گئی۔

ریلائنس سیکیورٹیز کے سینئر ریسرچ اینالسٹ جیگار تریویدی نے کہا کہ ڈالر انڈیکس چھ ماہ کی بلند ترین سطح کے قریب ہے اور 100 سے اوپر ہے، اگر یہ 100 کے اوپر ٹریڈ کرتا رہا تو سونے کی قیمتوں پر مزید دباؤ پڑے گا۔

جمعہ کو بھی ڈالر چھ ماہ کی بلند ترین سطح کے قریب مستحکم رہا جس کی وجہ سے ڈالر میں قیمت شدہ سونا دیگر کرنسی رکھنے والوں کے لیے مہنگا ہو گیا۔

سی ایم سی فیڈ واچ ٹول کے مطابق فیڈرل ریزرو کی آئندہ ماہ شرح سود میں کمی کے امکانات پیر کو 69 فیصد تک پہنچ گئے، جبکہ پچھلے سیشن میں یہ 74 فیصد تھے۔

جمعہ کو نیو یارک فیڈ کے صدر جان ولیمز کے نرم بیان کے بعد شرح سود میں کمی کے امکانات 40 فیصد سے بڑھ کر 74 فیصد تک جا پہنچے تھے۔

فیڈ کے دیگر ارکان نے سخت موقف اختیار کیا۔ ڈلاس فیڈرل ریزرو کی صدر لوری لوگن نے کہا کہ پالیسی ریٹ کو کچھ عرصے کے لیے برقرار رکھنا چاہیے جبکہ شکاگو اور کلیولینڈ کے فیڈ صدور نے خبردار کیا کہ اس وقت شرح سود میں مزید کمی کرنا معیشت کے لیے کئی خطرات رکھتا ہے۔ سونا جو غیر منافع بخش اثاثہ ہے، عموماً کم شرح سود والے ماحول میں اچھی کارکردگی دکھاتا ہے۔

بین الاقوامی جغرافیائی سیاسی منظرنامے میں امریکا اور یوکرین پیر کو روس کے ساتھ جنگ ختم کرنے کے منصوبے پر کام جاری رکھنے والے تھے، بعد ازاں ایک پہلے سے موجود تجویز میں ترمیم پر اتفاق ہوا، جسے وسیع پیمانے پر ماسکو کے حق میں زیادہ سازگار سمجھا جا رہا ہے۔

دوسری جانب اسپاٹ سلور 0.1 فیصد کی کمی کے ساتھ 49.95 ڈالر فی اونس پر رہا، پلاٹینم 1.5 فیصد بڑھ کر 1,533.85 ڈالر پر پہنچا اور پیلاڈیم 1.3 فیصد اضافہ کر کے 1,391.26 ڈالر ہو گیا۔