بینک مکرمہ کو ری اسٹرکچرنگ کے لیے عدالت کی منظوری مل گئی

بینک مکرمہ لمیٹڈ (بی ایم ایل) کو اسلام آباد ہائی کورٹ سے اپنے ری اسٹرکچرنگ پلان کی منظوری مل گئی ہے، جو بینک کو اس بات کی اجازت دیتا ہے کہ وہ اسٹیٹ بینک کی کم از کم سرمایہ کاری کے تقاضوں کی تعمیل کرسکے۔

بینک نے بدھ کو پاکستان اسٹاک ایکسچینج کو ایک نوٹس میں اس پیش رفت سے آگاہ کیا۔

کمپنیز ایکٹ 2017 کے سیکشنز 279 سے 283 اور 285(8) کے تحت بینک مکرمہ لمیٹڈ اور گلوبل ہیلی ڈویلپمنٹ لمیٹڈ کے درمیان بی ایم ایل کی ری اسٹرکچرنگ کے لیے دائر کیے گئے اسکیم آف آرینجمنٹ کے بعد کی درخواست کے نتیجے میں، اسلام آباد ہائی کورٹ نے ایک حکم نامہ جاری کیا ہے جس میں اس منصوبے کی منظوری دی گئی ہے۔

نوٹس میں کہا گیا کہ اس اسکیم کی منظوری کے بعد بی ایم ایل اب اسٹیٹ بینک کی طرف سے مقرر کردہ کم از کم سرمائے کی ضرورت کی تعمیل کر سکے گا۔

کمپنی کے مطابق اسکیم کے نفاذ سے کئی اہم تبدیلیاں سامنے آئیں گی۔ ری اسٹرکچرنگ کے عمل کے تحت بی ایم ایل، جی ایچ ڈی ایل کے شیئر ہولڈرز کو مکمل ادائیگی شدہ عام شیئرز جاری اور الاٹ کرے گا۔ بینک اپنے موجودہ شیئر کیپٹل میں بھی کمی کرے گا۔

ان ترامیم کے بعد بی ایم ایل کا جاری شدہ اور ادا شدہ کیپٹل 10 ارب روپے ہوگا جو ایک ارب عام شیئرز میں تقسیم کیا جائے گا جن کی فی شیئر قیمت 10 روپے ہوگی اور یہ اس تاریخ سے مؤثر ہوگا جو عدالت کی منظور شدہ اسکیم میں مقرر کی گئی ہے۔

نوٹس میں کہا گیا کہ اسکیم آف آرینجمنٹ کو مؤثر بنانے کے لیے، بک کلوزر بروقت، اسٹاک ایکسچینج سے مشاورت کے بعد اعلان کیا جائے گا۔

مالیاتی حوالے سے بی ایم ایل نے 30 ستمبر 2025 کو ختم ہونے والے نو ماہ کے دوران 1.75 ارب روپے منافع قبل از ٹیکس رپورٹ کیا جبکہ گزشتہ سال اسی مدت میں 5.05 ارب روپے کا نقصان ریکارڈ کیا گیا تھا۔