خیبر پختونخوا کے وزیرِاعلیٰ کا وفاق سے 850 ارب روپے کے واجبات کی فوری ادائیگی کا مطالبہ

خیبر پختونخوا کے وزیرِاعلیٰ سہیل آفریدی نے ہفتے کے روز وفاقی حکومت سے مطالبہ کیا کہ وہ فوری طور پر صوبے کے واجب الادا 850 ارب روپے جاری کرے جو مختلف مدات کے تحت بقایا ہیں، جن میں ضم شدہ قبائلی اضلاع کے فنڈز اور نیشنل فنانس کمیشن (این ایف سی) ایوارڈ کے واجبات شامل ہیں۔

باڑہ میں امن جرگے سے خطاب کرتے ہوئے وزیرِاعلیٰ نے کہا کہ صوبے کو ضم شدہ اضلاع کے لیے 550 ارب روپے اور این ایف سی ایوارڈ کے تحت مزید 350 ارب روپے ادا کیے جانے ہیں۔ انہوں نے وفاقی حکام پر زور دیا کہ نیٹ ہائیڈل منافع (این ایچ پی) کی مد میں 220 ارب روپے کے بقایاجات بھی فوری طور پر ادا کیے جائیں۔

سہیل آفریدی نے کہا کہ خیبر پختونخوا امن کے قیام میں ریاستِ پاکستان کے ساتھ کھڑا ہے اور سیکیورٹی فورسز کی حمایت جاری رکھے گا، تاہم انہوں نے خبردار کیا کہ اس بار کسی قسم کا کولیٹرل نقصان برداشت نہیں کیا جائے گا۔‘ انہوں نے کہا کہ کسی بے گناہ شہری کی جان ضائع نہیں ہونی چاہیے، اگر ایسا ہوا تو جوابدہی ہوگی۔ ان کا کہنا تھا کہ ضم شدہ اضلاع سے متعلق فیصلوں میں صوبائی حکومت، قبائلی مشران اور اراکینِ پارلیمنٹ کو شامل کیا جانا چاہیے۔ انہوں نے واضح کیا کہ بند کمروں میں ہونے والے فیصلے قبول نہیں کیے جائیں گے۔

وزیرِاعلیٰ نے الزام لگایا کہ علاقے میں ایک اور فوجی آپریشن کی تیاری کی جا رہی ہے، جسے ان کی حکومت ہونے نہیں دے گی۔ ماضی میں بدامنی نے 80 ہزار جانیں لیں، جن میں پولیس، کاؤنٹر ٹیررازم ڈیپارٹمنٹ (سی ٹی ڈی) اور سیکیورٹی فورسز کی قربانیاں شامل ہیں۔ امن بے پناہ قربانیوں کے بعد واپس آیا۔

سہیل آفریدی نے اس بات کا اعادہ کیا کہ صوبہ امن کے ساتھ ساتھ ترقی بھی چاہتا ہے۔ انہوں نے کہا کہ ضم کے وقت وفاقی حکومت نے قبائلی اضلاع کے لیے سالانہ 100 ارب روپے دینے کا وعدہ کیا تھا، لیکن وہ وعدہ آج تک پورا نہیں ہوا۔