ٹھٹھہ سیمنٹ کی ذیلی کمپنی کا بیلاروس کے ساتھ بلوچستان میں ٹریکٹر اسمبلنگ کا تاریخی معاہدہ

ٹھٹھہ سیمنٹ کمپنی لمیٹڈ (ٹی ایچ سی سی ایل) نے اعلان کیا ہے کہ اس کی مکمل ملکیتی ذیلی کمپنی، مِنسک ورک ٹریکٹر اینڈ اسمبلنگ (پرائیویٹ) لمیٹڈ، نے بیلاروس میں واقع او جے ایس سی مِنسک ٹریکٹر ورکس کے ساتھ بلوچستان میں بیلاروس ٹریکٹرز کو اسمبل کرنے اور مقامی طور پر تیار کرنے کے لیے خصوصی معاہدہ کیا ہے۔

پی ایس ایکس کو ارسال کردہ نوٹس میں کمپنی نے کہا کہ اس معاہدے کے تحت او جے ایس سی مِنسک ٹریکٹر ورکس نے ایم ڈبلیو ٹی اے کو بلوچستان میں بیلاروس ٹریکٹرز کی اسمبلنگ کے لیے خصوصی حقوق فراہم کیے ہیں۔

گزشتہ ماہ بزنس ریکارڈر نے رپورٹ کیا تھا کہ پاکستان 57 سے 80 ہارس پاور کے بیلاروس ٹریکٹرز کی مقامی اسمبلنگ کی تیاری کر رہا ہے جسے حکام نے ملک کے زرعی اور صنعتی شعبوں کے لیے ایک اہم پیش رفت قرار دیا ہے۔

بیلاروس ٹریکٹرز چار پہیوں والے مضبوط اور سادہ ڈیزائن کے ٹریکٹرز ہیں جو 1950 سے مینِسک، بیلاروس میں تیار کیے جارہے ہیں اور اب 100 سے زائد ممالک میں برآمد کیے جاتے ہیں۔ یہ ٹریکٹرز جدید خصوصیات کے ساتھ وقتاً فوقتاً اپ گریڈ کیے جاتے ہیں اور بنیادی آلات کے ذریعے آسانی سے برقرار رکھے جا سکتے ہیں۔

صنعتی ذرائع کے مطابق، آئندہ پانچ سال کے دوران مارکیٹ میں تقریباً 2,800 ٹریکٹر یونٹس کی طلب متوقع ہے جو زرعی پیداوار اور مشین کاری کے لیے اعلیٰ طاقت والی مشینری کی بڑھتی ہوئی ضرورت کی عکاسی کرتی ہے۔

ٹھٹھہ سیمنٹ کے نوٹس میں کہا گیا ہے کہ اس منصوبے کا مقصد بلوچستان میں مقامی صنعتی ترقی، روزگار کے مواقع پیدا کرنا اور ٹیکنالوجی کی منتقلی کو فروغ دینا ہے جس کے لیے ایک مقامی ٹریکٹر اسمبلنگ فیکٹری قائم کی جائے گی۔

نوٹس میں مزید کہا گیا کہ یہ معاہدہ کمپنی کی ذیلی کمپنی کے لیے اہم حکمت عملی کی پیش رفت کی علامت ہے اور توقع کی جا رہی ہے کہ یہ ٹھٹھہ سیمنٹ گروپ کے کاروباری پورٹ فولیو کی طویل مدتی ترقی اور تنوع پر مثبت اثر ڈالے گا۔

یاد رہے کہ ٹھٹھہ سیمنٹ کمپنی لمیٹڈ (ٹی ایچ سی سی ایل) پاکستان میں 1980 میں پبلک لمیٹڈ کمپنی کے طور پر قائم ہوئی تھی اور یہ سیمنٹ کی پیداوار اور مارکیٹنگ کے ساتھ ساتھ ٹھٹھہ پاور (پرائیویٹ) لمیٹڈ کی ملکیت بھی رکھتی ہے۔