امریلی اسٹیلز کا ایک ارب روپے کے نئے شیئر اجرا کا فیصلہ

امریلی اسٹیلز لمیٹڈ کے بورڈ آف ڈائریکٹرز نے 40 ملین عام حصص فی شیئر 25 روپے کے حساب سے نقد بنیاد پر جاری کرنے کی منظوری دے دی ہے جس کی کل مالیت ایک ارب روپے بنتی ہے۔

پاکستان اسٹاک ایکسچینج (پی ایس ایکس) کو پیر کو بھیجے گئے نوٹس کے مطابق یہ فیصلہ کمپنی کے بورڈ اجلاس میں 3 اکتوبر 2025 کو کیا گیا۔ یہ اجرا رائٹس ایشو کے بجائے براہِ راست سرمایہ کاری کے ذریعے کیا جائے گا۔

نوٹس میں بتایا گیا کہ نئے حصص فی شیئر 15 روپے پریمیم کے ساتھ امریلی اسٹیلز کے موجودہ اسپانسرز میں سے ایک، شایان اکبر علی، مکمل طور پر خریدیں گے۔ وہ فی الحال کمپنی میں 17.09 فیصد حصص کے مالک ہیں۔

مجوزہ اجرا کے بعد نئے حصص کمپنی کے موجودہ ادا شدہ سرمائے کا تقریباً 13.47 فیصد اور اجرا کے بعد کے مجموعی سرمائے کا 11.87 فیصد نمائندگی کریں گے۔

نوٹس کے مطابق اس اجرا سے حاصل ہونے والی رقم کمپنی کی ورکنگ کیپٹل ضروریات کو پورا کرنے اور کریڈٹ ری اسٹرکچرنگ (قرضوں کی ازسرِ نو تنظیم) میں سہولت فراہم کرنے کے لیے استعمال کی جائے گی۔

نوٹس میں کہا گیا کہ ورکنگ کیپٹل کی پوزیشن مضبوط ہونے سے کمپنی کی آپریٹنگ کیش فلو میں بہتری آئے گی، جس سے کاروباری سرگرمیوں کا تسلسل، پیداواری صلاحیت کا مؤثر استعمال اور مجموعی استحکام ممکن ہوگا۔ اس اقدام سے نہ صرف کمپنی کے تمام اسٹیک ہولڈرز کے مفادات کا تحفظ ہوگا بلکہ اقلیتی شیئر ہولڈرز کو بھی فائدہ پہنچے گا۔

امریلی اسٹیلز نے بتایا کہ اس نے ابتدائی طور پر رائٹس ایشو کے ذریعے ایکویٹی بڑھانے کا منصوبہ بنایا تھا، تاہم سیکیورٹیز اینڈ ایکسچینج کمیشن آف پاکستان (ایس ای سی پی) نے مشورہ دیا کہ ری اسٹرکچرنگ کے عمل اور اسٹیٹ بینک کے کریڈٹ انفارمیشن بیورو کی جاری کردہ رپورٹ کے باعث فی الحال رائٹس ایشو ممکن نہیں۔

اس صورتحال میں کمپنی نے اسپانسر کو براہِ راست شیئر جاری کرنے کا فیصلہ کیا۔ امریلی اسٹیلز نے اس موقع پر واضح کیا کہ یہ سرمایہ کاری اسپانسر فیملی کے کمپنی پر اعتماد اور اس کے مستقبل کے استحکام و ترقی کے عزم کی مظہر ہے۔