ٹرمپ کی یوکرین پالیسی میں تبدیلی غلط ، زیلنسکی کے دباؤ کا نتیجہ،کریملن

کریملن نے امریکی صدر ڈونلڈ ٹرمپ کے یوکرین کی جنگ سے متعلق حالیہ بیان پر سخت ردعمل کا اظہار کیا ہے۔ بدھ کو کریملن نے ٹرمپ کے اس یو ٹرن کی دلیل کو مسترد کرتے ہوئے کہا کہ ایسا لگتا ہے کہ امریکی صدر یوکرین کے رہنما سے متاثر ہوئے تھے اور وہ غلطی پر ہیں۔

ٹرمپ نے منگل کو یوکرین کے صدر وولودیمیر زیلنسکی سے ملاقات کے بعد کہا کہ انہیں یقین ہے کہ کیف روس کے قبضے میں اپنی تمام زمین واپس حاصل کر سکتا ہے، جو ملک کے تقریباً پانچویں حصے پر قابض ہے اور اس کے لیے اب فوری کارروائی کی ضرورت ہے کیونکہ ماسکو معاشی مشکلات کا سامنا کر رہا ہے۔

کچھ روسی قوم پرستوں نے ٹرمپ کے موقف میں اس اچانک تبدیلی کو اس بات کی علامت کے طور پر دیکھا کہ فوری امن معاہدہ میں ناکامی کے بعد وہ یوکرین کی جنگ سے اپنا ہاتھ کھینچ رہے ہیں اور نوٹ کیا کہ انہوں نے کیف کو مزید امریکی امداد دینے کا وعدہ نہیں کیا بلکہ ذمہ داری یوکرین اور یورپی یونین پر ڈال دی۔

کریملن، جو واشنگٹن کے ساتھ بہتر تعلقات کا خواہاں ہے، نے کہا کہ مغربی پابندیوں کے باوجود روسی معیشت مستحکم ہے اور یوکرین میں روسی افواج کی سست مگر مستحکم پیش رفت ایک سوچی سمجھی حکمت عملی کا حصہ ہے، جس میں ماسکو بیک فٹ پر نہیں بلکہ کیف ہے۔

کریملن کے ترجمان دمتری پیسکوف نے صحافیوں کو بتایا کہ صدر ٹرمپ کے بیانات، جو یوکرین کے صدر وولودیمیر زیلنسکی سے بات چیت کے بعد دیے گئے، بظاہر زیلنسکی کے وضع کردہ وژن کے زیر اثر تھے۔

انہوں نے مزید کہا کہ حقیقت یہ ہے کہ یوکرین کو ہر ممکن طریقے سے لڑائی جاری رکھنے کی ترغیب دی جا رہی ہے اور یہ دعویٰ کہ یوکرین اپنی زمین واپس حاصل کر سکتا ہے، ہماری نظر میں بالکل غلط ہے۔اگلے محاذ پر ہونے والی پیش رفت خود موجودہ حالات کی صحیح تصویر پیش کر رہی ہے۔

کریملن کے ترجمان دمتری پیسکوف نے کہا کہ یوکرین کو لڑائی جاری رکھنے کی ترغیب دینا اور یہ دعویٰ کرنا کہ وہ اپنی قبضے میں گئی زمین واپس حاصل کر سکتا ہے، بالکل غلط ہے۔

پیسکوف نے مزید کہا کہ وزیر خارجہ سرگئی لاوروف بدھ کو امریکی سیکرٹری آف اسٹیٹ مارکو روبیو سے ملاقات کریں گے اور واشنگٹن کو حقیقی معلومات فراہم کریں گے۔ ان کا کہنا تھا کہ روس اپنی پیش رفت جان بوجھ کر آہستہ کر رہا ہے ،تاکہ نقصان کم سے کم ہو اور فوجی صلاحیت برقرار رہے۔