پاکستان اور سعودی عرب کا تاریخی اسٹریٹجک دفاعی معاہدہ

پاکستان اور سعودی عرب نے بدھ کے روز وزیرِاعظم شہباز شریف کے دورۂ ریاض کے دوران ایک تاریخی اسٹریٹجک باہمی دفاعی معاہدے پر دستخط کیے، یہ دورہ ولی عہد اور وزیرِاعظم شہزادہ محمد بن سلمان کی دعوت پر کیا گیا تھا۔

وزیراعظم کے دفتر کی جانب سے جاری مشترکہ اعلامیے کے مطابق یہ معاہدہ دونوں ممالک کے درمیان تقریباً آٹھ دہائیوں پر محیط تاریخی شراکت داری کو اجاگر کرتا ہے اور دفاعی تعاون اور علاقائی سلامتی کو مضبوط بنانے کے لیے ان کے مشترکہ عزم کی عکاسی کرتا ہے۔

معاہدے کے تحت، پاکستان یا سعودی عرب میں سے کسی ایک کے خلاف جارحیت کو دونوں ریاستوں کے خلاف جارحیت تصور کیا جائے گا، اس طرح مشترکہ دفاعی صلاحیت کو تقویت ملے گی۔ دونوں رہنماؤں نے باہمی مفادات اور اسلامی یکجہتی کے تحت اسٹریٹجک تعلقات کو مزید فروغ دینے کے عزم کا اعادہ کیا۔

حکومتی سطح پر مذاکرات ریاض کے قصرِ یمامہ میں ہوئے، جہاں شہباز شریف نے شاہ سلمان بن عبدالعزیز آل سعود کو پرتپاک سلام پہنچایا اور سعودی قیادت کے ساتھ وسیع پیمانے پر دو طرفہ اور علاقائی امور پر تبادلہ خیال کیا۔

شہباز شریف نے اپنے اور اپنے وفد کو دی گئی گرمجوش مہمان نوازی پر اظہارِ تشکر کیا، جبکہ ولی عہد نے پاکستان کی ترقی اور خوشحالی کے لیے نیک خواہشات کا اظہار کیا۔

ولی عہد نے وزیرِاعظم شہباز شریف کا استقبال کیا

اس سے قبل وزیرِاعظم شہباز شریف ریاض کے قصرِ یمامہ پہنچے تاکہ سعودی ولی عہد سے ملاقات کریں۔

وزیراعظم آفس میڈیا وِنگ نے ایک پریس ریلیز میں بتایا کہ شاہی محل پہنچنے پر وزیرِاعظم کو سعودی شاہی پروٹوکول کے ساتھ خوش آمدید کہا گیا اور گھوڑوں پر سوار گارڈز نے استقبال کیا۔

وزیراعظم شہباز شریف کو سوار گارڈ آف آنر کے ساتھ وصول کیا گیا اور قصرِ یمامہ میں ولی عہد نے ان کا خیر مقدم کیا۔ سعودی مسلح افواج نے گارڈ آف آنر پیش کیا۔

وزیراعظم آفس کی پریس ریلیز کے مطابق دونوں رہنماؤں کے درمیان دو طرفہ مذاکرات ہوئے ہیں۔

اجلاس میں نائب وزیراعظم و وزیرِخارجہ محمد اسحاق ڈار، فیلڈ مارشل سید عاصم منیر (چیف آف آرمی اسٹاف)، وزیرِدفاع خواجہ محمد آصف، وزیرِخزانہ محمد اورنگزیب، وزیرِماحولیات ڈاکٹر مصدق ملک اور وزیراعظم کے معاونِ خصوصی سید طارق فاطمی بھی شریک تھے۔

وزیراعظم، ولی عہد محمد بن سلمان کی دعوت پر سعودی عرب کے دورے پر ہیں۔

وزارتِ خارجہ نے اس روز کہا تھا کہ وزیراعظم ولی عہد کے ساتھ دو طرفہ ملاقات کریں گے اور پاکستان–سعودی عرب تعلقات کے پورے دائرہ کار کا جائزہ لیں گے۔

وزارتِ خارجہ نے بیان میں کہا کہ دونوں رہنما علاقائی اور عالمی معاملات پر بھی، جو باہمی دلچسپی کے حامل ہیں، تبادلۂ خیال کرنے کی توقع ہے۔

وزارت خارجہ نے مزید کہا کہ اس دورے کے نتیجے میں مختلف شعبوں میں تعاون کو باضابطہ شکل دی جائے گی، جو دونوں طرف کی اس مشترکہ وابستگی کو ظاہر کرتا ہے کہ وہ اپنے دیرینہ برادرانہ تعلقات کو مزید بہتر اور گہرا کرنا چاہتے ہیں۔

بیان کے مطابق وزیراعظم کا یہ دورہ دونوں رہنماؤں کو یہ موقع فراہم کرے گا کہ وہ اس منفرد شراکت داری کو مستحکم کریں اور نئے شعبوں میں تعاون کے مواقع تلاش کریں تاکہ دونوں ممالک کے عوام کو فائدہ پہنچے۔

15 ستمبر کو وزیراعظم نے دوحہ میں ہنگامی عرب-اسلامی سربراہی اجلاس کے موقع پر ولی عہد سے ملاقات کی تھی۔

پاکستان اور سعودی عرب کے تاریخی تعلقات کو دہراتے ہوئے وزیراعظم نے پاکستان کے لیے مملکت کی مستقل حمایت پر شکریہ ادا کیا۔

سعودی ولی عہد نے اقوامِ متحدہ کی سلامتی کونسل اور او آئی سی میں قطر کے ساتھ یکجہتی کے اظہار کے لیے پاکستان کی فعال سفارتی کوششوں کو سراہا۔

انہوں نے کہا کہ وہ وزیراعظم کے آئندہ سرکاری دورے کے منتظر ہیں۔