ڈالر کے مقابلے میں روپے کی پیش قدمی جاری

انٹربینک مارکیٹ میں منگل کو بھی ڈالر کے مقابلے روپے کی قدر میں بہتری کا سلسلہ جاری رہا۔

اسٹیٹ بینک کے مطابق کاروبار کے اختتام پر ڈالر کے مقابلے میں روپیہ ایک پیسے کی بہتری سے 277.76 روپے پر بند ہوا۔

یاد رہے کہ پیر کو مقامی کرنسی 277.77 روپے پر بند ہوئی تھی۔

دوسری جانب عالمی منڈی میں ین کی خرید میں مداخلت اور تیل کی قیمتوں میں کمی کے باعث امریکی ڈالر کو نقصان کا سامنا کرنا پڑا۔ڈالر کے مقابلے میں یورو معمولی تبدیلی کے ساتھ 1.1511 ڈالر پر رہا، جو گزشتہ سیشن میں ڈیڑھ ماہ کی بلند ترین سطح 1.1559 ڈالر پر پہنچ گیا تھا، جبکہ برطانوی پاؤنڈ (اسٹرلنگ) 0.06 فیصد کمی کے ساتھ 1.3427 ڈالر پر آ گیا۔ڈالر انڈیکس ڈیڑھ ماہ کی کم ترین سطح سے سنبھل کر 99.98 پر پہنچ گیا۔ مارکیٹس فی الوقت دسمبر تک امریکی فیڈرل ریزرو کی جانب سے شرحِ سود میں تقریباً 35 بیسس پوائنٹس کے اضافے کا تخمینہ لگا رہی ہیں، جبکہ تمام تر توجہ جمعہ کو جاری ہونے والی روزگار کی رپورٹ (جابس رپورٹ) پر مرکوز ہے۔دیگر کرنسیوں میں آسٹریلین ڈالر 0.04 فیصد اضافے کے ساتھ 0.7003 ڈالر پر پہنچ گیا، جبکہ نیوزی لینڈ ڈالر 0.1 فیصد گر کر 0.5867 ڈالر پر آ گیا۔

مزید برآں گزشتہ سیشن میں بڑی گراوٹ کے بعد منگل کو خام تیل کی قیمتوں میں 1 فیصد کی واپسی (ریکوری) دیکھی گئی۔ قیمتوں میں اس اضافے کی وجہ یہ خدشات ہیں کہ امریکہ ایران کشیدگی، جس نے تیل کی ترسیل کو متاثر کیا ہے، کا سفارتی حل فی الحال بعید از قیاس دکھائی دیتا ہے جس سے مشرقِ وسطیٰ سے سپلائی کو خطرات لاحق ہیں۔برینٹ خام تیل کے مستقبل کے سودے (فیوچرز) 1.12 ڈالر یا 1.3 فیصد اضافے کے ساتھ 84.89 ڈالر فی بیرل پر پہنچ گئے، جبکہ اس سے قبل یہ 7 فیصد کی بڑی گراوٹ کے ساتھ تین ہفتوں کی کم ترین سطح پر آ گئے تھے۔اسی طرح امریکی ویسٹ ٹیکساس انٹرمیڈیٹ خام تیل 77 سینٹ یا 1 فیصد اضافے کے ساتھ 81.11 ڈالر پر آ گیا، جو گزشتہ سیشن میں 5 فیصد سے زیادہ گر کر تقریباً ایک ہفتے کی کم ترین سطح پر بند ہوا تھا۔