ڈالر کے مقابلے روپے کی قدر میں بہتری کا سلسلہ جاری

انٹربینک مارکیٹ جمعرات کو بھی ڈالر کے مقابلے روپے کی قدر میں بہتری کا سلسلہ جاری رہا ۔

کاروبار کے اختتام پرڈالر کے مقابلے روپیہ 4 پیسے یا 0.01 فیصد کی بہتری سے 281.56 روپے کا ہوگیا۔

واضح رہے کہ یہ مسلسل 25 واں روز ہے جب ڈالر روپے کے مقابلے تنزلی کا شکار ہے۔

یاد رہے کہ بدھ کو مقامی کرنسی 281.60 پر بند ہوئی تھی۔

عالمی سطح پر امریکی ڈالر جمعرات کو ایشیائی مارکیٹ کے ابتدائی کاروباری سیشن میں مستحکم رہا کیونکہ امریکا میں فیکٹری گیٹ پرائسز میں غیر متوقع کمی نے اس توقع کو تقویت دی کہ فیڈرل ریزرو آئندہ ہفتے شرحِ سود میں کمی کرے گا، جبکہ تاجر دن کے بعد جاری ہونے والے امریکی کنزیومر پرائس ڈیٹا کے منتظر رہے۔

ڈالر انڈیکس معمولی اضافے کے ساتھ 97.822 پر پہنچ گیا، جو مسلسل تیسرے دن اضافہ ہے۔ امریکی محکمہ محنت کے بیورو آف لیبر اسٹیٹسٹکس کے مطابق بدھ کو جاری اعدادوشمار میں بتایا گیا کہ اگست کے دوران پروڈیوسر پرائس انڈیکس برائے فائنل ڈیمانڈ میں 0.1 فیصد کمی ہوئی۔

مارکیٹس اس توقع پر ٹریڈ کررہی ہیں کہ فیڈرل ریزرو کی جانب سے پالیسی میں نرمی یقینی ہے اور اب واحد سوال یہ ہے کہ شرحِ سود کتنی کم کی جائے گی۔ سی ایم ای گروپ کے فیڈ واچ ٹول کے مطابق، ٹریڈرز ستمبر میں ہونے والے سینٹرل بینک کے اجلاس میں 50 بیسس پوائنٹس کی بڑی کٹوتی کے امکانات کو 8 فیصد مان رہے ہیں جبکہ کم از کم 25 بیسس پوائنٹس کی کمی کو یقینی سمجھا جارہا ہے۔

ین کے مقابلے ڈالر 147.41 ین پر بغیر کسی تبدیلی کے ٹریڈ کر رہا تھا۔

یورو معمولی اضافے سے 1.1698 ڈالر تک پہنچ گیا، یورپی سینٹرل بینک کے پالیسی اجلاس سے قبل جو جمعرات کو بعد میں متوقع تھا جہاں شرحِ سود کو برقرار رکھنے کا وسیع امکان ظاہر کیا جا رہا ہے۔