وزیر داخلہ محسن نقوی کی افغان ہم منصب سے سرحد پار دہشت گردی اور ٹی ٹی پی پر بات چیت

وفاقی وزیر داخلہ محسن نقوی نے ہفتے کے روز کابل کے ایک روزہ سرکاری دورے کے دوران اپنے افغان ہم منصب سراج الدین حقانی کے ساتھ ایک اہم ملاقات کی۔ دونوں رہنماؤں نے کئی اہم امور پر تبادلہ خیال کیا، جن میں انسداد دہشت گردی کی کوششوں میں اضافہ، سرحد پار سے دراندازی کی روک تھام اور کالعدم تحریک طالبان پاکستان (ٹی ٹی پی) سے درپیش خطرہ شامل ہیں۔

افغان وزارت داخلہ پہنچنے پر محسن نقوی کا سراج حقانی نے گرمجوشی سے استقبال کیا۔ دونوں وزراء نے باہمی تعلقات کو مضبوط بنانے پر مرکوز جامع بات چیت کی۔

انہوں نے منشیات کی اسمگلنگ، سرحد پار غیر قانونی نقل و حرکت، اور پاکستان میں غیر قانونی طور پر مقیم افغان شہریوں کی وطن واپسی کے چیلنجز پر بھی بات چیت کی۔

دونوں فریقین نے پرامن بقائے باہمی اور دونوں ہمسایہ ممالک کے درمیان مستحکم، باہمی تعاون کی اہمیت پر زور دیا۔ انہوں نے سرحدی سیکیورٹی کو بہتر بنانے اور دہشت گردی کے خطرے کو ختم کرنے کے لیے ہم آہنگی بڑھانے پر اتفاق کیا۔

وزیر داخلہ محسن نقوی نے کہا کہدہشت گرد تنظیمیں خطے میں افراتفری اور عدم استحکام پیدا کر رہی ہیں انہوں نے مزید کہا کہ پاکستان اور افغانستان کو اس خطرے کو شکست دینے کے لیے مل کر کام کرنا چاہیے۔

انہوں نے افغانستان کے ساتھ برادرانہ اور طویل المدتی تعلقات برقرار رکھنے کے پاکستان کے عزم کا اعادہ کیا، اور افغان مہاجرین کے لیے ملک کی دہائیوں پرانی مہمان نوازی کا ذکر کیا۔ انہوں نے مزید کہا کہ افغان شہریوں کے قانونی داخلے کے لیے ہمارے دروازے کھلے ہیں۔

ملاقات میں افغانستان کے سینئر نائب وزیر داخلہ ابراہیم سردار، پاکستان کے لیے خصوصی نمائندہ محمد صادق، وفاقی سیکرٹری داخلہ خرم آغا، اور دونوں ممالک کی وزارت داخلہ کے سینئر حکام نے شرکت کی۔

اس سے قبل دن میں، وزیر داخلہ محسن نقوی کا کابل انٹرنیشنل ایئرپورٹ پر افغان نائب وزیر داخلہ محمد نبی عمری اور دیگر سینئر افغان حکام نے استقبال کیا۔

محسن نقوی کا یہ دورہ ڈپٹی پرائم منسٹر اور وزیر خارجہ سینیٹر اسحاق ڈار کے کابل کے حالیہ دورے کے چند روز بعد ہوا ہے، کیونکہ پاکستان بین الاقوامی شراکت داروں کے ساتھ اسٹریٹجک اور سیکیورٹی تعاون کو گہرا کرنے کی کوشش کر رہا ہے۔

اس دورے کے دوران اسحاق ڈار نے جمعرات کو افغانستان کے قائم مقام وزیر داخلہ حقانی سے ملاقات کی تھی، جہاں دونوں فریقین نے علاقائی سیکیورٹی تعاون اور سرحدی انتظام پر تفصیل سے بات چیت کی۔

دونوں فریقین نے خطے میں سیکیورٹی خطرات کو ختم کرنے کی اہمیت کا اعادہ کیا اور امن و استحکام برقرار رکھنے کے لیے قریبی تعاون کی ضرورت پر زور دیا۔

اسحاق ڈار نے اقتصادی تعاون اور علاقائی انضمام کی مکمل صلاحیت کو کھولنے کے لیے تمام تشویشناک مسائل، خاص طور پر سیکیورٹی اور سرحدی انتظام سے متعلق امور کو حل کرنے کی اہم اہمیت پر زور دیا۔