وزیرِاعظم کا ایرانی سفارتخانے کا دورہ، اسرائیلی جارحیت میں جانی نقصان پر تعزیت

وزیرِاعظم شہباز شریف نے حالیہ اسرائیلی جارحیت کے دوران ایرانی شہریوں کے جانی نقصان پر اظہار افسوس اور تعزیت کے لئے منگل کے روز اسلام آباد میں اسلامی جمہوریہ ایران کے سفارتخانے کا دورہ کیا ہے۔

وزیرِاعظم کے ہمراہ نائب وزیرِاعظم و وزیرِ خارجہ محمد اسحاق ڈار، وزیرِاعظم کے معاونِ خصوصی طارق فاطمی اور سیکرٹری خارجہ بھی موجود تھے۔

اس موقع پر وزیرِاعظم نے ایرانی سفارتخانے میں تعزیتی کتاب میں اپنے تاثرات قلم بند کیے۔

ایرانی سفیر رضا امیری مقدم اور دیگر سینئر سفارتی حکام نے وزیرِاعظم کا استقبال کیا۔

شہباز شریف نے ایران کے عوام اور حکومت کے ساتھ دلی ہمدردی اور یکجہتی کا اظہار کرتے ہوئے ایرانی قوم کے حوصلے اور عزم کو خراجِ تحسین پیش کیا۔

وزیرِاعظم نے کہا کہ پاکستان اس مشکل وقت میں ایران کے ساتھ کھڑا ہے۔ انہوں نے جاں بحق افراد کے لیے دعا مغفرت اور زخمیوں کی جلد صحت یابی کی دعا بھی کی۔

وزیرِاعظم شہباز شریف نے ایران کے لیے پاکستان کی مستقل اور مسلسل حمایت کے عزم کا اعادہ کرتے ہوئے ایرانی سپریم لیڈر آیت اللہ علی خامنہ ای اور صدر ڈاکٹر مسعود پزیشکیان کے لیے نیک تمناؤں اور عقیدت کا پیغام بھی پہنچایا۔

وزیرِاعظم کا یہ دورہ پاکستان کی اس دیرینہ پالیسی کی عکاسی کرتا ہے جو خطے میں امن، استحکام اور ہمسایہ ممالک کے ساتھ یکجہتی کو فروغ دینے پر مبنی ہے اور جو باہمی احترام اور تعاون کے وسیع تر اصولوں سے ہم آہنگ ہے۔