سیمنٹ انڈسٹری کی مشکلات

یہ سال سیمنٹ انڈسٹری کے لیے خاصا مشکل ثابت ہوا جس کی بڑی وجہ ملک میں طلب کی کمی تھی۔ مالی سال 2025 کے ابتدائی 11 مہینوں میں سیلز گزشتہ سال کے مقابلے میں 2 فیصد کم ہوئیں۔ رواں سال کی کارکردگی مالی سال 2023 کے مقابلے میں 6 فیصد اور مالی سال 2022 کے مقابلے میں تقریباً 20 فیصد کم رہی۔

اس دوران، سیمنٹ انڈسٹری نے شاندار منافع بھی کمایا کیونکہ کئی سالوں بعد پہلی بار قیمتوں میں تیزی سے اضافہ دیکھنے میں آیا۔ شمالی زون میں قیمتیں 30 فیصد بڑھ گئیں جبکہ جنوبی زون میں سیمنٹ کی قیمتوں میں 25 فیصد اضافہ ہوا۔

نہ صرف قیمتوں میں بے تحاشا اضافہ ہوا ہے بلکہ طلب میں بھی مسلسل کمی آتی جارہی ہے۔ شمالی زون میں سیمنٹ کی قیمتیں مالی سال 2022 میں اوسطاً 744 روپے تھیں جو مالی سال 2023 میں 1000 روپے، مالی سال 2024 میں 1200 روپے اور اب مالی سال 2025 میں 1400 روپے سے تجاوز کر چکی ہیں۔ جنوبی زون کی قیمتیں بھی اسی طرز پر بڑھی ہیں تاہم وہاں قیمتیں نسبتاً مستحکم رہتی ہیں۔ ایک اور اہم تبدیلی یہ ہوئی کہ مالی سال 2023 میں شمالی زون کی قیمتیں جنوبی زون سے بڑھ گئیں۔

شمالی مارکیٹوں نے تب سے اب تک یہی قیمتوں کا فرق برقرار رکھا ہے۔ مالی سال 2023 سے قبل جنوبی علاقوں میں سیمنٹ کی قیمتیں ہمیشہ شمالی علاقوں سے زیادہ ہوا کرتی تھیں۔ طلب کا رجحان کافی غیر یقینی رہا ہے۔ بین الاقوامی سطح پر کوئلے کی قیمتوں میں اتار چڑھاؤ اور روپے کی قدر میں مسلسل کمی نے سیمنٹ ساز اداروں کو مالی سال 2021 کے بعد قیمتیں بڑھانے پر مجبور کیا۔

جنوبی علاقوں میں قیمتیں ہمیشہ زیادہ رہتی تھیں کیونکہ شمالی علاقوں میں مقابلہ شدید تھا۔ تاہم پہلے مرحلے میں طلب میں زبردست اضافہ ہوا جس نے سیمنٹ ساز اداروں کو قیمتیں بڑھانے میں سہولت دی، اور پھر ایسی تباہ کن مہنگائی آئی جس نے قیمتوں میں اضافے کے بغیر کاروبار کو جاری رکھنا ناممکن بنا دیا۔

مالی سال 2025 میں اگرچہ سیمنٹ کی قیمتوں میں اتار چڑھاؤ پہلے جتنا نہیں رہا، تاہم یہ کبھی خاطر خواہ حد تک کم بھی نہیں ہوئیں۔ طلب بدستور کمزور اور غیرموزوں رہی۔ درحقیقت، بہتر قیمتیں ہی وہ واحد سہارا تھیں جنہوں نے سیمنٹ کمپنیوں کو مالی لحاظ سے بہتر کارکردگی دکھانے کا موقع دیا۔ دوسرا سہارا برآمدات تھیں۔ 11 ماہ میں سیمنٹ کی برآمدات میں 26 فیصد اضافہ ہوا اور یہ مجموعی فروخت کے تقریباً 20 فیصد تک پہنچ گئیں — جو کہ گزشتہ ایک دہائی میں سب سے بلند ترین شرح ہے۔

مالی سال 2026 میں اگر پبلک سیکٹر ڈیولپمنٹ پروگرام کی رقم وقت پر جاری ہوتی رہی تو طلب میں بہتری آ سکتی ہے۔ مالی دباؤ بڑھنے پر حکومت سب سے پہلے ترقیاتی اخراجات میں کمی کرتی ہے، جو ایک معمول کی بات ہے۔ تاہم، حکومت کی متوقع مارک اپ اسکیم مورگیجز کے لیے گھر بنانے کی طلب کو بحال کر سکتی ہے، جو کم از کم کچھ عرصے کے لیے اس شعبے میں جان ڈالے گی۔

تعمیراتی مواد بنانے والی کمپنیاں اس پر امید رکھ سکتی ہیں۔ اگرچہ مالی سال میں طلب یقینی طور پر بڑھے گی، چاہے مالی سال 26 کے بعد کچھ سست روی ہو جائے، لیکن اگر سیمنٹ کمپنیاں قیمتیں مستحکم رکھ سکیں تو وہ آسانی سے منافع بخش کارکردگی جاری رکھ پائیں گی۔

مسئلہ اس وقت پیدا ہوسکتا ہے جب برآمدات کی طلب کم ہوجائے جو کہ سیمنٹ بنانے والوں کے لیے مقامی مارکیٹ کی کمزوری میں بہترین متبادل ہوتی ہے۔ یہ صورتحال ان کے لیے مزید مشکلات کا باعث بن سکتی ہے۔

کاپی رائٹ بزنس ریکارڈر 2025