پاکستان کا روسی تیل و گیس کمپنی کے ساتھ توانائی تعاون کو مضبوط بنانے کا عزم
- وفاقی وزیر پٹرولیم علی پرویز ملک کی سربراہی میں اعلیٰ سطح وفد کی گیزپروم کے نمائندوں سے ملاقات
وفاقی وزیر برائے پٹرولیم علی پرویز ملک کی سربراہی میں اعلی سطح وفد نے روس کی معروف تیل و گیس کمپنی گیزپروم کے نمائندوں سے ملاقات کی۔
روسی وفد کی قیادت گیزپروم انٹرنیشنل کے ڈائریکٹر جنرل سرگئی تومانوف نے کی۔اس موقع پر آئل اینڈ گیس ڈویلپمنٹ کمپنی لمیٹڈ کے منیجنگ ڈائریکٹر احمد لک بھی موجود تھے۔
ملاقات توانائی شعبے میں دو طرفہ تعاون کو بڑھانے پر مرکوز تھی، خاص طور پر او جی ڈی سی ایل اور گیزپروم انٹرنیشنل کے درمیان مشترکہ منصوبوں اور کاروباری ترقی کے مواقع پر زور دیا گیا۔
اس دوران دونوں فریقین نے پاکستان کی بڑھتی ہوئی توانائی کی ضروریات اور گیزپروم کی عالمی سطح پر تیل و گیس کی تلاش، پیداوار اور بنیادی ڈھانچے کی ترقی میں مہارت کو مدنظر رکھتے ہوئے توانائی شعبے میں تعاون کو مضبوط بنانے کے عزم کا اعادہ کیا۔
بات چیت میں ممکنہ شراکت داری کے مختلف شعبوں کو اجاگر کیا گیا۔
او جی ڈی سی ایل اور گیزپروم انٹرنیشنل نے اتفاق کیا کہ باہمی مشاورت کے عمل کو جاری رکھیں گے تاکہ قابل عمل منصوبے اور شراکت داری کے مواقع تلاش کئے جا سکیں جو دونوں ممالک کے لئے پائیدار توانائی کی ترقی اور معاشی خوشحالی کو یقینی بنائیں گے۔
یہ ملاقات پاکستان اور روس کے درمیان توانائی کے شعبے میں تعلقات کو مزید فروغ دینے کی جانب ایک اہم قدم ہے جو توانائی کے شعبے میں طویل المدتی تعاون اور مشترکہ معاشی ترقی کے وژن کو تقویت دیتی ہے۔
کاپی رائٹ بزنس ریکارڈر 2025
Comments
Comments are closed.