ای سی سی نے دفاعی مقاصد کیلئے گاڑیوں، ہیلی کاپٹرز کی درآمد اور دوبارہ برآمد کی منظوری دیدی

کابینہ کی اقتصادی رابطہ کمیٹی (ای سی سی) نے امپورٹ پالیسی آرڈر (آئی پی او) 2022 میں ترامیم کی منظوری دیدی ہے، جس کے تحت سرکاری دفاعی ادارے اور ان کی مکمل ملکیتی کمرشل ذیلی کمپنیاں دفاعی مقاصد کے لیے گاڑیاں، ہیلی کاپٹرز اور اس سے متعلقہ پرزہ جات درآمد کر سکیں گی اور ان اشیاء کو بعد ازاں دوبارہ برآمد کیا جاسکے گا۔ یہ معلومات سیکریٹری کامرس کے قریبی ذرائع نے بزنس ریکارڈر کو فراہم کیں۔

ذرائع کے مطابق وزارت تجارت نے ای سی سی کے گزشتہ اجلاس میں بتایا کہ اسپیشل انویسٹمنٹ فسیلیٹیشن کونسل (ایس آئی ایف سی) نے وزارت سے درخواست کی تھی کہ آئی پی او 2022 میں ترمیم کی جائے تاکہ دفاعی مقاصد کے لیے مخصوص گاڑیوں، ہیلی کاپٹرز اور اسیمبلیز کی درآمد اور ان کی دوبارہ برآمد کی اجازت دی جا سکے۔ یہ معاملہ دو کمپنیوں، میسرز ایرو سلوشنز اور میسرز مارگلہ ہیوی انڈسٹریز لمیٹڈ کی درخواست پر ایس آئی ایف سی میں زیربحث آیا تھا، جس میں وزارت دفاع، وزارت دفاعی پیداوار، وزارت صنعت و پیداوار، ایف بی آر اور دیگر متعلقہ اداروں نے اس تجویز کی حمایت کی، تاکہ دفاعی شعبے میں برآمدی صلاحیت کو بڑھایا جا سکے۔

ایکسپورٹ فسیلیٹیشن اسکیم (ای ایف ایس) کے تحت دفاعی ٹیکنالوجیز کی ان پٹ-آؤٹ پٹ ریشو (آئی او آر ایس) کے تعین کے لیے فیصلہ کیا گیا کہ ای ڈی بی کے ذریعے ان پٹ-آؤٹ پٹ ریشو کے تعین کی شرط ختم کی جائے، کیونکہ دفاعی برآمدی منصوبوں کی حساس نوعیت کو مدنظر رکھا گیا ہے۔ اس کے متبادل کے طور پر، وزارت دفاعی پیداوار کی جانب سے تشکیل کردہ کمیٹی ان پٹ-آؤٹ پٹ ریشو کا تعین کرے گی۔ اس مقصد کے لیے کسٹمز رولز میں ضروری ترامیم کا عمل پاکستان-سعودی عرب دفاعی منصوبے اور دیگر دفاعی برآمدی منصوبے“ کے مالیاتی اور حسابی نظام کے تحت پہلے ہی جاری ہے۔ وزارت دفاعی پیداوار نے اس کمیٹی کی تشکیل کی تجویز دے دی ہے اور ایف بی آر کو ہدایت دی گئی ہے کہ ترمیم شدہ نوٹیفکیشن تمام متعلقہ اسٹیک ہولڈرز اور ایس آئی ایف سی سے شیئر کیا جائے۔

ایس آئی ایف سی کی جانب سے شیئر کی گئی مجوزہ ترامیم کے مطابق، وزارت تجارت نے اپنی رائے دیتے ہوئے شرط رکھی کہ دفاعی گاڑیوں، ہیلی کاپٹروں اور اسیمبلیز کی درآمد صرف برآمدی مقاصد کے لیے کی جائے گی۔ مزید یہ کہ صرف وہی سرکاری دفاعی ادارے اور ان کی مکمل ملکیتی کمرشل کمپنیاں اس سہولت سے فائدہ اٹھا سکیں گی جو ایف بی آر کی ای ایف ایس 2021 اسکیم میں رجسٹرڈ ہوں گی تاکہ کسٹم ڈیوٹی میں چھوٹ حاصل کی جا سکے۔

21 مارچ 2025 کو ایس آئی ایف سی کے مراسلے میں دی گئی تجاویز کی روشنی میں امپورٹ پالیسی آرڈر 2022 میں مخصوص دفعات کے تحت مذکورہ ترامیم تجویز کی گئیں۔

کاپی رائٹ بزنس ریکارڈر، 2025