ڈالر کے مقابلے روپے کی قدر میں بہتری

انٹربینک مارکیٹ میں جمعہ کے کاروباری روز امریکی ڈالر کے مقابلے میں پاکستانی روپے کی قدر میں 0.02 فیصد بہتری ریکارڈ کی گئی ہے۔

کاروبار کے اختتام پر ڈالر کے مقابلے میں قدر 5 پیسے بڑھنے کے بعد روپیہ 282 روپے 2 پیسے پر بند ہوا۔

یاد رہے کہ جمعرات روپیہ 282.07 روپے پر بند ہوا تھا۔

بین الاقوامی سطح پر جمعہ کو ڈالر کی قدر میں کمی ریکارڈ کی گئی جو مسلسل پانچویں مہینے کی کمی کی جانب گامزن ہے کیونکہ تاجروں نے تجارتی اور مالیاتی مسائل کے حوالے سے مزید غیر یقینی صورتحال کا سامنا کرنے کی تیاری کرلی ہے جبکہ سرمایہ کار دن کے آخر میں اہم مہنگائی رپورٹ کا انتظار کررہے ہیں۔

امریکی ڈالر کا ہفتہ غیر مستحکم رہا اور گزشتہ اجلاس میں اس کی قدر کم ہوئی، کیونکہ وفاقی عدالت نے صدر ڈونلڈ ٹرمپ کے سب سے زیادہ وسیع محصولات کو عارضی طور پر دوبارہ نافذ کردیا جب کہ ایک دوسری تجارتی عدالت نے ایک دن قبل ان محصولات پر فوری پابندی عائد کی تھی۔

جمعرات کو ٹرمپ نے تجارتی عدالت کے فیصلے پرتنقید کی اور کہا کہ وہ امید کرتے ہیں کہ سپریم کورٹ اس فیصلے کو کالعدم قرار دے دے گی۔

محصولات کے حوالے سے غیر یقینی صورتحال نے مارکیٹوں پر سخت گرفت بنا لی ہے کیونکہ سرمایہ کار امریکی اثاثے چھوڑ کر متبادل تلاش کررہے ہیں اور اس بات سے خوفزدہ ہیں کہ ٹرمپ کی غیر متوقع پالیسیاں امریکی مارکیٹوں کی مضبوطی اور کارکردگی کو متاثر کرسکتی ہیں۔

جمعہ کو یورو معمولی مضبوط ہو کر 1.1378 ڈالر پر پہنچ گیا، جبکہ سوئس فرانک بھی مضبوط ہو کر ایک ڈالر کے مقابلے میں 0.8216 پر ٹریڈ کررہا تھا۔

امریکی کرنسی سوئس فرانک، یورو اور پاؤنڈ کے مقابلے میں ماہانہ کمی کی جانب ہے۔

ڈالر انڈیکس مستحکم رہا، یہ انڈیکس مئی میں 0.4 فیصد کمی کے ساتھ مسلسل پانچویں ماہ خسارے میں جانے کے راستے پر گامزن ہے ۔