ایم پی سی اجلاس: اسٹیٹ بینک نے ششماہی شیڈول جاری کردیا

اسٹیٹ بینک آف پاکستان (ایس بی پی) نے مانیٹری پالیسی کمیٹی (ایم پی سی) کے اجلاسوں کے ششماہی شیڈول کا اعلان کر دیا ہے۔ اس سلسلے میں ایم پی سی کا اگلا اجلاس 27 جنوری 2025 کو ہوگا جس میں اقتصادی اشاریوں پر غور و خوض کیا جائے گا تاکہ کلیدی پالیسی ریٹ پر فیصلہ کیا جاسکے۔

اس سال کا ایم پی سی کا دوسرا اجلاس 10 مارچ کو ہوگا، تیسرا اجلاس 5 مئی کو اور چوتھا اجلاس 16 جون کو طلب کیا جائے گا۔ ان اجلاسوں میں سے جنوری 2025 میں ایم پی سی کے اجلاس کے بعد گورنر اسٹیٹ بینک جمیل احمد پریس کانفرنس کریں گے۔

گزشتہ پانچ اجلاسوں کے دوران ایم پی سی نے کلیدی پالیسی ریٹ کو 9 فیصد کم کرکے 22 فیصد سے 13 فیصد کردیا ہے اور مارکیٹ جنوری کے اجلاس میں پالیسی ریٹ میں ایک اور کٹوتی کی توقع کر رہی ہے کیونکہ افراط زر میں مسلسل کمی کا سلسلہ جاری ہے۔

پاکستان میں افراط زر میں نمایاں کمی کا رجحان دیکھا جارہا ہے، دسمبر 24 میں افراط زر کی شرح 4.1 فیصد ریکارڈ کی گئی تھی جو پہلے ہی 80 ماہ کی کم ترین سطح تھی۔

اسٹیٹ بینک نے پہلے ہی اندازہ لگایا ہے کہ 2025 کے آخر تک افراط زر 5 سے 7 فیصد رہنے کی توقع ہے۔ تاہم رواں سال فروری سے جون تک اس گراوٹ کے رجحان میں تبدیلی کا امکان ہے۔

تجزیہ کاروں کا کہنا ہے کہ افراط زر میں تیزی سے کمی کی کئی اہم وجوہات ہیں جن میں اعلی بنیادی اثرات، امریکی ڈالر کے مقابلے میں پاکستانی روپے کا استحکام اور خوراک اور توانائی کے شعبوں میں قیمتوں میں کمی شامل ہیں۔

اے ایچ ایل ریسرچ کے مطابق جنوری 25 میں حقیقی شرح سود 9.98 فیصد تک پہنچنے کا تخمینہ ہے ، جو اس کی تاریخی اوسط 2.5 فیصد سے نمایاں طور پر زیادہ ہے۔ مزید برآں، پالیسی ریٹ اور بنیادی افراط زر کے درمیان تاریخی پھیلاؤ گزشتہ 9 سال میں اوسطا 1.7 فیصد رہا ہے۔ ان اشارے سے ظاہر ہوتا ہے کہ اسٹیٹ بینک کے پاس ریٹ ایڈجسٹمنٹ کی کافی گنجائش موجود ہے۔

اے ایچ ایل کو توقع ہے کہ جنوری 25 کے آئندہ مانیٹری پالیسی اجلاس میں شرح سود میں 100 بی پی ایس کٹوتی کی جائے گی۔ اس سے پالیسی ریٹ کم ہو کر 12 فیصد رہ جائے گا۔

کاپی رائٹ بزنس ریکارڈر، 2025