امن مذاکرات کی بحالی، امریکی نائب صدر وینس کا ایرانی عہدیدار کو خط

امریکی نائب صدر جے ڈی وینس نے ایران کے ساتھ امن مذاکرات بحال کرنے کی کوشش کرتے ہوئے ایرانی قومی سلامتی کونسل کے سربراہ محسن رضائی سے رابطہ کیا ہے، تاکہ اسلامی جمہوریہ ایران پر ممکنہ امریکی حملے کو روکا جاسکے۔

وال اسٹریٹ جرنل کے مطابق، وینس نے امریکی صدر ڈونلڈ ٹرمپ کی ہدایت پر محسن رضائی کو خط بھیجا۔ رپورٹ کے مطابق، خط اور اس کے بعد امریکی و ایرانی عہدیداروں کے درمیان ہونے والی بات چیت میں امن معاہدے کی تفصیلات کے بجائے مذاکرات کے ممکنہ طریقہ کار پر توجہ دی گئی۔

فروری کے اواخر میں امریکا اور اسرائیل کی جانب سے شروع کی گئی جنگ نے خلیجی ممالک سے توانائی کی ترسیل کو شدید متاثر کیا ہے، جس کے باعث عالمی معیشت پر بھی منفی اثرات مرتب ہوئے ہیں۔

ایران نے جنگ شروع ہونے کے بعد آبنائے ہرمز میں اہم بحری گزرگاہ کی ناکہ بندی کردی، جہاں سے پہلے دنیا کے تقریباً 20 فیصد حصے کے تیل اور مائع قدرتی گیس کی ترسیل ہوتی تھی۔ دوسری جانب امریکا نے ایرانی بندرگاہوں کی بحری ناکہ بندی برقرار رکھی ہوئی ہے۔

وال اسٹریٹ جرنل کے مطابق، واشنگٹن نے خلیجی عرب ممالک کو 3 نومبر کے وسط مدتی انتخابات کے بعد ایران کے خلاف مختصر اور شدید فوجی کارروائی کے امکان سے بھی آگاہ کیا ہے، تاہم ٹرمپ نے تاحال حتمی فیصلہ نہیں کیا۔

ایرانی فوج نے خبردار کیا ہے کہ نئے حملے کی صورت میں جوابی کارروائی کا دائرہ وسیع کیا جاسکتا ہے۔ محسن رضائی کے مطابق، امریکی مفادات سے وابستہ ڈیٹا سینٹرز اور مصنوعی ذہانت کے مراکز بھی ممکنہ اہداف ہوسکتے ہیں۔