ڈالر کے مقابلے روپے کی قدر میں بہتری کا سلسلہ جاری

انٹربینک مارکیٹ میں بدھ کو بھی ڈالر کے مقابلے روپے کی قدر میں بہتری کا سلسلہ جاری رہا۔

اسٹیٹ بینک کے مطابق کاروبار کے اختتام پر ڈالر کے مقابلے میں روپیہ 3 پیسے کی بہتری سے 276.77 روپے پر بند ہوا۔

یاد رہے کہ منگل کو مقامی کرنسی 276.80 روپے پر بند ہوئی تھی۔

عالمی کرنسی مارکیٹ میں بدھ کو امریکی ڈالر دو ہفتوں کی بلند ترین سطح پر برقرار رہا، جبکہ سرمایہ کاروں کی توجہ مرکزی بینکوں کے پالیسی فیصلوں پر مرکوز ہے۔ توقع ہے کہ امریکی فیڈرل ریزرو شرح سود برقرار رکھے گا، تاہم اس کے آئندہ دسمبر میں ممکنہ فیصلے سے متعلق اشارے مارکیٹ کی سمت کا تعین کرسکتے ہیں۔

فیڈرل ریزرو کے فیصلے سے قبل بیشتر بڑی کرنسیوں کی قدر میں نمایاں تبدیلی نہیں ہوئی۔ یورو 1.1129 ڈالر پر مستحکم رہا جب کہ برطانوی پاؤنڈ بھی 1.3307 ڈالر پر برقرار رہا۔ جاپانی ین کے مقابلے میں ڈالر کی قدر میں اتار چڑھاؤ دیکھا گیا اور یہ 0.1 فیصد کمی کے بعد 157.81 ین پر آگیا۔

نیوزی لینڈ کے مرکزی بینک کی جانب سے شرح سود غیر متوقع طور پر 2.75 فیصد پر برقرار رکھنے کے بعد نیوزی لینڈ ڈالر 1.7 فیصد تک گر کر 0.5585 امریکی ڈالر پر آگیا۔ رائٹرز کے سروے میں 27 میں سے 22 ماہرین اقتصادیات نے شرح سود میں اضافے کی پیش گوئی کی تھی۔

دوسری جانب آسٹریلوی ڈالر 0.1 فیصد اضافے کے بعد 0.7035 امریکی ڈالر پر پہنچ گیا۔ آسٹریلیا میں رواں سال کی تیسری سہ ماہی کے دوران افراط زر کی شرح 1.3 فیصد رہی، جبکہ گزشتہ سہ ماہی میں یہ 0.6 فیصد تھی۔ بنیادی افراط زر کی سالانہ شرح 3.6 فیصد پر برقرار رہی، جو مرکزی بینک کے مقررہ ہدف سے زیادہ ہے۔

ادھر امریکی ڈالر انڈیکس منگل کو 0.3 فیصد اضافے کے بعد 102.40 پر پہنچ گیا جو 14 اکتوبر کے بعد بلند ترین سطح ہے۔ امریکی 10 سالہ ٹریژری بانڈ کی ییلڈ 4.9967 فیصد پر برقرار رہی، جبکہ بٹ کوائن 80,736.07 ڈالر اور ایتھر 2,345.25 ڈالر پر ٹریڈ کررہے تھے۔