تہران کے ساتھ مذاکرات بہتر انداز میں آگے بڑھ رہے ہیں، ٹرمپ پر امید

امریکی صدر ڈونلڈ ٹرمپ نے کہا ہے کہ تہران کے ساتھ مذاکرات کافی اچھے انداز میں آگے بڑھ رہے ہیں۔ انہوں نے ایران جنگ سے متعلق مذاکرات کے بارے میں اپنا مثبت مؤقف دہرایا، تاہم بات چیت کی تفصیلات بیان نہیں کیں۔

ٹرمپ نے فاکس 5 لاس ویگاس کے صحافی ٹام ڈوریان کو دیے گئے فاکس 5 ون-آن- ون پروگرام میں انٹرویو کے دوران کہا کہ میں نے سنا ہے کہ بات چیت بہت اچھی چل رہی ہے۔

اگرچہ ایران جنگ اپنے چھٹے مہینے میں داخل ہو چکی ہے اور دونوں فریق اب تک تنازع کے مستقل خاتمے پر متفق نہیں ہو سکے، تاہم ٹرمپ مسلسل ان مذاکرات کو مثبت انداز میں پیش کرتے رہے ہیں۔

ٹرمپ کا کہنا ہے کہ آبنائے ہرمز، جسے جنگ کے آغاز کے بعد ایران نے توانائی کی ترسیل کے اہم راستے کے طور پر بند کر دیا تھا، اسے دوبارہ کھولنے سے متعلق معاہدہ جلد متوقع ہے۔

ٹرمپ نے انٹرویو میں کہا کہ میرا مقصد لوگوں کو ہلاک کرنا یا ہر چیز کو مکمل طور پر تباہ کرنا نہیں ہے، حالانکہ صورتحال اسی طرف جا رہی تھی۔ وہ مذاکرات کرنا چاہتے تھے اور ہم یہی کر رہے ہیں، اور ایسا لگتا ہے کہ یہ کافی اچھے انداز میں آگے بڑھ رہا ہے۔

انسانی حقوق کے ماہرین نے شہری بنیادی ڈھانچے کو نشانہ بنانے سے متعلق ٹرمپ کی دھمکیوں کی مذمت کی ہے۔

ایران نے خبردار کیا ہے کہ اگر امریکا نے ان دھمکیوں پر عمل کیا تو تہران خطے کے اہم بنیادی ڈھانچے کو نشانہ بنائے گا۔