مردان میں طیارہ حادثہ، پاک فضائیہ کے فلائٹ لیفٹیننٹ اور پاک بحریہ کے لیفٹیننٹ شہید

پاک فضائیہ کا تربیتی طیارہ ضلع مردان میں معمول کی تربیتی پرواز کے دوران حادثے کا شکار ہوگیا جس کے نتیجے میں پاک فضائیہ کے فلائٹ لیفٹیننٹ محمد قاسم عبداللہ اور پاک بحریہ کے لیفٹیننٹ طحہٰ عباسی شہید ہوگئے۔

دوسری جانب وفاقی وزیر داخلہ محسن نقوی نے حادثے پر گہرے رنج و غم کا اظہار کرتے ہوئے شہید پائلٹس کو خراجِ عقیدت پیش کیا۔ حادثے میں تین دیگر افراد بھی زخمی ہوئے ہیں۔

انہوں نے اپنے بیان میں کہا کہ پائلٹس نے وطن کی خدمت کے دوران شہادت کا عظیم رتبہ پایا۔

وزیر داخلہ نے شہدا کے اہل خانہ سے دلی ہمدردی اور تعزیت کا اظہار کیا۔ انہوں نے حادثے میں زخمی ہونے والے تینوں افراد کی جلد صحت یابی کے لیے بھی دعا کی۔

آئی ایس پی آر کے مطابق حادثے کی وجوہات کا تعین کرنے کیلئے ایئر ہیڈکوارٹرز نے بورڈ آف انکوائری تشکیل دے دیا ہے۔

فیلڈ مارشل سید عاصم منیر، سروسز چیفس اور پاک افواج کے تمام رینکس نے قیمتی جانوں کے ضیاع پر گہرے دکھ اور افسوس کا اظہار کیا ہے۔ آئی ایس پی آر کے مطابق پاک افواج کی قیادت نے شہداء کے اہل خانہ سے دلی تعزیت اور ہمدردی کا اظہار بھی کیا۔

پاک فضائیہ کے ترجمان نے بتایا کہ چیف آف دی ایئر اسٹاف ایئر چیف مارشل ظہیر احمد بابر سدھو نے مسلح افواج کے ان افسران کی شہادت پر گہرے دکھ اور صدمے کا اظہار کیا جنہوں نے معمول کی تربیتی پرواز کے دوران جامِ شہادت نوش کیا۔

ایئر چیف نے فرض کی ادائیگی کے دوران قوم کی خدمت کرتے ہوئے جان نچھاور کرنے والے دونوں نوجوان افسران کے غیر متزلزل عزم، مثالی پیشہ ورانہ مہارت اور عظیم قربانی کو زبردست خراجِ تحسین پیش کیا۔ انہوں نے کہا کہ ان کی بہادری، عزم اور فرض شناسی پاک مسلح افواج کی بہترین روایات کی عکاس ہے اور یہ آنے والی نسلوں کے لیے مشعلِ راہ بنی رہے گی۔

ایئر چیف نے سوگوار خاندانوں سے دلی تعزیت کا اظہار کیا اور دعا کی کہ اللہ تعالیٰ شہدا کو جنت الفردوس میں اعلیٰ مقام عطا فرمائے اور ان کے اہل خانہ کو اس ناقابلِ تلافی نقصان کو برداشت کرنے کے لیے صبر، ہمت اور حوصلہ عطا کرے۔