امریکا،ایران امن مذاکرات میں سہولت کاری، پاکستانی وزیر داخلہ ایران پہنچ گئے

ایرانی میڈیا نے رپورٹ کیا ہے کہ پاکستان کے وزیرِ داخلہ ہفتے کے روز تہران پہنچ گئے تاکہ ایران اور امریکا کے درمیان تعطل کا شکار امن مذاکرات کو آگے بڑھانے میں ”سہولت کاری“ کر سکیں۔

تسنیم نیوز ایجنسی کے مطابق ”محسن نقوی آج اسلامی جمہوریہ ایران کے دو روزہ سرکاری دورے پر پہنچے ہیں، جو پاکستان کی ان جاری کوششوں کا حصہ ہے جن کا مقصد مذاکرات میں سہولت فراہم کرنا اور خطے میں امن کو فروغ دینا ہے۔“

ایرانی وزیرِ داخلہ اسکندر مومنی نے تہران پہنچنے پر ان کا استقبال کیا۔ محسن نقوی کا یہ دورہ ایسے وقت میں ہوا ہے جب چند روز قبل پاکستان کے بااثر آرمی چیف فیلڈ مارشل عاصم منیر بھی ایران کا دورہ کر چکے ہیں۔

اسلام آباد امریکا اور ایران کے درمیان جاری امن مذاکرات میں فعال ثالثی کردار ادا کر رہا ہے، اور گزشتہ ماہ دونوں فریقوں کے وفود کے درمیان ایک اہم اور اعلیٰ سطح کی ملاقات کی میزبانی بھی کر چکا ہے۔

8 اپریل سے نافذ جنگ بندی نے اس لڑائی کو بڑی حد تک روک دیا ہے جو 28 فروری کو امریکا اور اسرائیلی افواج کے ایران پر حملوں کے بعد شروع ہوئی تھی۔

ایرانی وزیرِ خارجہ عباس عراقچی نے جمعے کے روز کہا کہ تہران کو واشنگٹن کی جانب سے ایسے پیغامات موصول ہوئے ہیں جن سے ظاہر ہوتا ہے کہ صدر ڈونلڈ ٹرمپ کی انتظامیہ مذاکرات جاری رکھنے پر آمادہ ہے۔

ایران کے چیف مذاکرات کار اور پارلیمنٹ کے اسپیکر محمد باقر قالیباف نے منگل کے روز کہا کہ واشنگٹن کو ایران کی امن تجویز قبول کرنی چاہیے، ورنہ ”ناکامی“ کا سامنا کرنا پڑے گا، انہوں نے خبردار کیا کہ ٹرمپ کی جانب سے ایرانی جوابی تجویز مسترد کیے جانے کے بعد جنگ بندی ”نازک صورتحال“ سے دوچار ہے۔

انہوں نے سوشل میڈیا پر لکھا کہ ”ایرانی عوام کے حقوق کو 14 نکاتی تجویز کے مطابق تسلیم کرنے کے سوا کوئی راستہ نہیں۔ اس کے علاوہ ہر راستہ مکمل طور پر غیر مؤثر ہوگا اور صرف ناکامیوں کا تسلسل ثابت ہوگا۔“