ٹرمپ کا آبنائے ہرمز میں بحری ٹریفک کی بحالی میں مدد فراہم کرنے کا اعلان

امریکی صدر ڈونلڈ ٹرمپ نے بدھ کو کہا ہے کہ امریکہ آبنائے ہرمز میں بحری ٹریفک کی بحالی اور اضافے میں مدد فراہم کرے گا۔

قبل ازیں ٹرمپ نے ایران کی جانب سے آبنائے ہرمز کو دوبارہ کھولنے یا بصورتِ دیگر سویلین انفرااسٹرکچر پر حملوں کا سامنا کرنے کی دی گئی ڈیڈ لائن ختم ہونے سے محض دو گھنٹے پہلے ایران کے ساتھ دو ہفتوں کی جنگ بندی پر اتفاق کیا تھا۔

ٹرمپ نے کہا ہے کہ معاہدے کا انحصار ایران کی اس رضامندی پر ہے کہ وہ آبنائے ہرمز کے ذریعے تیل اور گیس کی سپلائی کی ناکہ بندی روک دے گا جہاں سے عام طور پر عالمی سطح پر تیل کی ترسیل کا تقریباً پانچواں حصہ گزرتا ہے۔

ٹرمپ نے کہا کہ ہم ہر طرح کے سامان کی لوڈنگ کریں گے اور محض وہاں موجود رہیں گے تاکہ اس بات کو یقینی بنایا جا سکے کہ سب کچھ ٹھیک رہے۔

انہوں نے یہ بھی کہا کہ وہاں بہت سے مثبت اقدامات ہونگے! بڑے پیمانے پر سرمایہ کاری ہوگی اور ایران (جنگ کے بعد) تعمیرِ نو کا عمل شروع کر سکتا ہے۔

ٹرمپ نے خبر رساں ادارے اے ایف پی کو بتایا کہ ایران کے ساتھ دو ہفتوں کی جنگ بندی کے معاہدے پر اتفاق کے بعد امریکہ نے مکمل اور بھرپور فتح حاصل کرلی ہے۔

لڑائی میں عارضی وقفے اور آبنائے ہرمز کے دوبارہ کھلنے سے مشرق وسطیٰ کے برآمد کنندگان کو تیل کی وہ بڑی مقدار بھیجنے میں مدد ملے گی جو دشمنی کے آغاز سے خلیج کے اندر پھنسی ہوئی ہے۔

اینالیٹکس فرم کپلر کے اعداد و شمار کے مطابق، اس وقت خطے میں تقریباً 200 بحری ٹینکرز پر 13 کروڑ بیرل خام تیل اور 4 کروڑ 60 لاکھ بیرل ریفائنڈ ایندھن موجود ہے۔