مشرقِ وسطیٰ میں امن کی کوششیں: سعودی عرب، ترکیہ اور مصر کے وزرائے خارجہ کل اسلام آباد پہنچیں گے

مشرقِ وسطیٰ کے بڑھتے ہوئے تنازع کو روکنے کیلئے ایک بڑی سفارتی کوشش کے تحت سعودی عرب، ترکیہ اور مصر کے وزرائے خارجہ اتوار کو دو روزہ دورے پر اسلام آباد پہنچیں گے۔

نائب وزیراعظم و وزیر خارجہ سینیٹر اسحاق ڈار کی دعوت پر سعودی عرب کے وزیر خارجہ شہزادہ فیصل بن فرحان آل سعود، ترکیہ کے وزیر خارجہ حقان فیدان اور مصر کے وزیر خارجہ ڈاکٹر بدر عبدالعاطی 29 سے 30 مارچ 2026 تک اسلام آباد کا دورہ کریں گے۔

دفترِ خارجہ کے مطابق دورے کے دوران تینوں ممالک کے وزرائے خارجہ کے ساتھ اہم علاقائی اور عالمی امور پر تفصیلی مشاورت کی جائے گی جس میں  خطے میں کشیدگی کم کرنے کی کوششیں سرفہرست ہوں گی، مہمان وزرائے خارجہ وزیراعظم شہباز شریف سے بھی ملاقات کریں گے۔

بیان میں مزید کہا گیا کہ پاکستان سعودی عرب، ترکیہ اور مصر جیسے برادر ممالک کے ساتھ اپنے تعلقات کو قدر کی نگاہ سے دیکھتا ہے، یہ دورہ باہمی دلچسپی کے کثیر جہتی شعبوں میں ان ممالک کے ساتھ پاکستان کے تعاون اور ہم آہنگی کو مزید مستحکم کرنے کا ایک بہترین موقع فراہم کرے گا۔

جیسے جیسے یہ تنازع طول پکڑرہا ہے، پاکستان ایران اور امریکہ کے درمیان ایک کلیدی ثالث کے طور پر ابھرا ہے جہاں اسلام آباد دونوں متحارب فریقین کے درمیان پیغامات کی منتقلی کیلئے ایک رابطے کا ذریعہ بن کر کام کررہا ہے۔

ترک وزیرخارجہ ہاکان فیدان نے نجی نشریاتی ادارے اے ہیبرسے گفتگو کرتے ہوئے بتایا کہ ابتدائی طور پر ہمارا منصوبہ یہ اجلاس ترکیہ میں منعقد کرنے کا تھا تاہم چونکہ ہمارے پاکستانی ہم منصبوں کا اپنے ملک میں موجود رہنا ضروری ہے، اس لیے ہم نے اجلاس پاکستان منتقل کردیا۔

انقرہ کے اعلیٰ ترین سفارت کار کے مطابق ان مذاکرات میں چاروں مسلم اکثریتی ممالک کے وزرائے خارجہ شرکت کریں گے۔

اس سے قبل جمعہ کو جرمنی کے وزیر خارجہ یوہان واڈیفل نے اپنے ذرائع کا انکشاف کیے بغیر کہا کہ وہ بہت جلد پاکستان میں امریکہ اور ایران کے درمیان براہِ راست ملاقات کی توقع کررہے ہیں۔

اگرچہ تہران نے واشنگٹن کے ساتھ باضابطہ مذاکرات کے انعقاد کے اعتراف سے انکار کیا لیکن ایرانی خبر رساں ایجنسی تسنیم کے حوالے سے ایک گمنام ذرائع نے بتایا کہ ایران نے جنگ کے خاتمے کے لیے امریکی صدر ڈونلڈ ٹرمپ کے 15 نکاتی منصوبے کا جواب اسلام آباد کے ذریعے بھجوا دیا ہے۔