آیت اللہ علی خامنہ ای کا تابوت عراق کے مقدس شہر نجف پہنچ گیا

ایران کے مقتول سپریم لیڈر آیت اللہ علی خامنہ ای کا تابوت منگل کو ایران میں کئی روز تک جاری رہنے والی آخری رسومات کے بعد عراق کے مقدس شہر نجف پہنچ گیا، جہاں ان کی یاد میں مذہبی تقریبات اور عوامی جلوس منعقد کیے جا رہے ہیں۔

عراقی سرکاری ٹی وی کے مطابق وزیرِاعظم علی الزیدی اور دیگر اعلیٰ حکام نے نجف انٹرنیشنل ایئرپورٹ پر تابوت کا استقبال کیا۔ اس موقع پر ایرانی صدر مسعود پزشکیان بھی نجف پہنچے تاکہ آخری رسومات میں شرکت کر سکیں۔

نجف دنیا بھر کے شیعہ مسلمانوں کے لیے خاص مذہبی اہمیت رکھتا ہے کیونکہ یہاں حضرت امام علیؓ کا روضہ مبارک واقع ہے۔ سرکاری استقبالیہ تقریب میں عراقی سیاسی قیادت اور ممتاز شیعہ مذہبی شخصیات نے بھی شرکت کی، جس کے بعد تابوت کو عوامی دیدار اور سوگ کی تقریبات کے لیے شہر میں لے جایا گیا۔

ایران میں جمعہ سے شروع ہونے والی سرکاری تدفینی تقریبات کو اسلامی جمہوریہ ایران نے مذہبی عقیدت کے اظہار کے ساتھ ساتھ ریاستی تسلسل کی علامت کے طور پر بھی پیش کیا۔ جلوس تہران سے قم اور پھر عراق کے شہر نجف پہنچا۔

عراقی حکام نے تابوت کی آمد سے قبل نجف میں سکیورٹی کے سخت انتظامات کیے، جبکہ عراق اور پڑوسی ممالک سے بڑی تعداد میں زائرین اور سوگوار نجف پہنچے۔ اطلاعات کے مطابق بدھ کو تابوت کو عوامی جلوس کے ذریعے شہر میں لے جایا جائے گا۔

سرکاری منصوبے کے مطابق اس کے بعد جلوس عراق کے مقدس شہر کربلا روانہ ہوگا، جبکہ ہفتے کے اختتام پر تابوت کو دوبارہ ایران منتقل کیا جائے گا، جہاں مشہد میں تدفین کی جائے گی۔

واضح رہے کہ ایرانی حکام کے مطابق آیت اللہ علی خامنہ ای 28 فروری کو ایران پر ہونے والے امریکی اور اسرائیلی حملے میں شہید ہوئے تھے۔