پیٹرول کی قیمت میں 7 روپے 6 پیسے اور ڈیزل میں 3 روپے 71 پیسے فی لیٹر کمی

حکومت نے پیٹرول کی قیمت میں 7 روپے 6 پیسے فی لیٹر کمی کردی ہے، جس کے بعد نئی قیمت 362 روپے فی لیٹر ہوگئی ہے، جبکہ ہائی اسپیڈ ڈیزل کی قیمت 3 روپے 71 پیسے فی لیٹر کم ہوکر 387 روپے 81 پیسے مقرر کردی گئی ہے۔ نئی قیمتوں کا اطلاق 5 نومبر 2026 سے ہوگا۔

آئل اینڈ گیس ریگولیٹری اتھارٹی (اوگرا) کی جانب سے بدھ کے روز جاری کردہ پریس ریلیز میں ڈپو سطح پر نئی قیمتوں کا اعلان کیا گیا۔

اوگرا کے مطابق قیمتوں میں ردوبدل وفاقی حکومت کے منظور کردہ پیٹرولیم مصنوعات کی قیمتوں کے تعین کے طریقہ کار کے تحت کیا گیا ہے۔

پیٹرول کی سابقہ قیمت 369 روپے 6 پیسے فی لیٹر جبکہ ہائی اسپیڈ ڈیزل کی قیمت 391 روپے 52 پیسے فی لیٹر تھی۔

حکومت نے منگل کے روز پیٹرول کی قیمت میں 5 روپے 45 پیسے کمی کرکے 369 روپے 6 پیسے فی لیٹر اور ڈیزل کی قیمت میں 3 روپے 68 پیسے کمی کرکے 391 روپے 52 پیسے فی لیٹر مقرر کی تھی۔

عالمی منڈی میں بدھ کے روز تیل کی قیمتوں میں اتار چڑھاؤ کے دوران کمی ریکارڈ کی گئی، کیونکہ سرمایہ کار ایران کے خلاف امریکا اور اسرائیل کی جنگ کے حوالے سے واشنگٹن کے اگلے اقدام کے منتظر تھے۔ اس دوران وسط مدتی انتخابات میں ڈیموکریٹس نے صدر ڈونلڈ ٹرمپ کی ریپبلکن جماعت سے کانگریس کا کنٹرول حاصل کرلیا تھا۔

گرینچ معیاری وقت کے مطابق صبح 10 بج کر 34 منٹ پر برینٹ خام تیل کے سودے 1.75 ڈالر، یعنی 0.7 فیصد کمی کے بعد 101.85 ڈالر فی بیرل پر آگئے۔ کاروباری سیشن کے دوران اس سے قبل قیمت میں 2 ڈالر تک کمی ہوئی تھی۔ امریکی ویسٹ ٹیکساس انٹرمیڈیٹ (ڈبلیو ٹی آئی) خام تیل کے سودے بھی 1.18 ڈالر، یعنی 1.2 فیصد کمی کے بعد 94.91 ڈالر فی بیرل پر آگئے، جبکہ اس سے قبل دونوں اقسام کے تیل کی قیمتوں میں ایک، ایک ڈالر کا اضافہ ہوا تھا۔

گزشتہ کاروباری سیشن میں برینٹ خام تیل کی قیمت تقریباً چار ہفتوں کی کم ترین سطح پر بند ہوئی تھی، کیونکہ تاجر یوکرین اور ایران کی جنگیں ختم کرنے کے لیے جاری مذاکرات کے ممکنہ نتائج کا جائزہ لے رہے تھے۔