لزبن میں رہائشی بحران کے خلاف احتجاجی کیمپ پولیس نے ختم کرا دیا

پرتگال کے دارالحکومت لزبن کے مرکزی علاقے میں اتوار کی علی الصبح پولیس نے رہائش کے بحران کے خلاف احتجاجی کیمپ ختم کرا دیا، اس دوران مظاہرین پر چڑھائی کی گئی اور متعدد افراد کو گرفتار کر لیا گیا۔ واقعے میں معمولی زخمی ہونے کی اطلاعات ہیں، تاہم زخمیوں کی تعداد فوری طور پر معلوم نہیں ہو سکی۔

پرتگال میں رہائش کی بڑھتی قیمتیں سنگین بحران بن چکی ہیں۔ 2017 کے بعد گھروں کی قیمتیں دگنی سے زیادہ ہو گئی ہیں، جبکہ نئے کرایہ ناموں کے تحت کرائے بھی تقریباً دگنے ہو چکے ہیں۔ اس صورت حال سے نوجوان طبقہ خاص طور پر متاثر ہے۔

ہفتے کے روز ہزاروں افراد نے دارالحکومت کی ایک مرکزی شاہراہ پر مارچ کیا، جس کے بعد مظاہرین نے روسیو اسکوائر میں 100 سے زائد خیمے نصب کیے۔ پولیس نے رات 2 بجے کے بعد کتوں سمیت درجنوں اہلکاروں کے ذریعے کیمپ ختم کرایا۔ پولیس نے مظاہرین کو پہلے خیمے ہٹانے کی ہدایت کی تھی۔

بینک آف پرتگال کے مطابق، ملک بھر میں 3 لاکھ گھروں کی کمی ہے، جو لزبن کے مجموعی رہائشی ذخیرے کے برابر ہے۔

مظاہرین حکومت سے بے دخلی آسان بنانے اور نئے کرایہ ناموں پر کرایوں کی حد ختم کرنے سے متعلق بل واپس لینے کا مطالبہ کر رہے ہیں۔ ان کا کہنا ہے کہ بڑھتے کرائے اور مہنگائی عام خاندانوں پر دباؤ بڑھا رہے ہیں۔ یہ احتجاج بیلجیم، فرانس، اٹلی اور اسپین میں ہونے والے ایسے مظاہروں کے بعد سامنے آیا ہے۔