لیبیا کے دارالحکومت طرابلس کے مغرب میں دھماکا، سکیورٹی ادارے کے 9 اہلکار ہلاک

لیبیا کے دارالحکومت طرابلس کے مغرب میں واقع شہر زاویہ میں اتوار کی رات تربیتی مشق کے دوران 82 ملی میٹر کا مارٹر گولہ پھٹنے سے سکیورٹی ادارے کے کم از کم 9 اہلکار ہلاک اور متعدد زخمی ہوگئے۔

استنبول سے نشریات پیش کرنے والے ٹی وی چینل لیبیا الاحرار کے مطابق دھماکے میں انسدادِ خطرات سکیورٹی ایجنسی کے اہلکار متاثر ہوئے۔ یہ ادارہ اقوام متحدہ کی تسلیم شدہ حکومتِ قومی اتحاد کے ماتحت کام کرتا ہے، جس کی سربراہی وزیراعظم عبدالحمید الدبیبہ کر رہے ہیں۔

چینل نے طبی ذرائع کے حوالے سے بتایا کہ واقعے میں دیگر افراد بھی زخمی ہوئے، تاہم زخمیوں کی تعداد نہیں بتائی گئی۔ حکام کی جانب سے فوری طور پر کوئی بیان سامنے نہیں آیا۔

زاویہ طرابلس سے تقریباً 40 کلومیٹر مغرب میں واقع ہے اور یہاں لیبیا کی سب سے بڑی فعال آئل ریفائنری موجود ہے۔ یہ شہر حریف مسلح گروہوں کے درمیان بار بار ہونے والی جھڑپوں کا مرکز بھی رہا ہے۔

لیبیا 2011 میں معمر قذافی کی حکومت کے خاتمے کے بعد سے بدامنی کا شکار ہے اور ملک کے مغرب اور مشرق میں متوازی حریف انتظامیہ کے باعث اب بھی سیاسی و انتظامی تقسیم کا سامنا کر رہا ہے۔