تاجروں کو بڑے چیلنجز کا سامنا ہے، چیئرمین پی پی ڈی اے

یونائیٹڈ بزنس گروپ (یو بی جی) کی کور کمیٹی کے رکن اور پاکستان پیٹرولیم ڈیلرز ایسوسی ایشن (پی پی ڈی اے) کے چیئرمین ملک خدا بخش نے کہا ہے کہ موجودہ معاشی حالات میں کاروباری برادری کو توانائی کی بلند قیمتوں، پیداواری اخراجات میں اضافے، سرمایہ کاری کے فروغ اور تجارتی سرگرمیوں کی توسیع جیسے بڑے چیلنجز کا سامنا ہے۔

انہوں نے فیڈریشن آف پاکستان چیمبرز آف کامرس اینڈ انڈسٹری (ایف پی سی سی آئی) کی صدارت کے لیے ایس ایم تنویر کو یو بی جی کی متفقہ نامزدگی پر مبارک باد دیتے ہوئے امید ظاہر کی کہ وہ اپنی صلاحیتوں اور تجربے کو بروئے کار لاکر تاجروں کے مسائل حل کرنے، صنعتی ترقی کے فروغ اور کاروبار دوست ماحول کی تشکیل میں مؤثر کردار ادا کریں گے۔

ملک خدا بخش کے مطابق ایس ایم تنویر کا تجارتی اور صنعتی شعبوں میں وسیع تجربہ، کاروباری حلقوں سے مضبوط روابط اور مسائل کے حل کے لیے عملی کوششیں انہیں نمایاں مقام دیتی ہیں۔ ان کی نامزدگی کاروباری برادری کے اعتماد کی عکاس ہے۔

انہوں نے کہا کہ پی پی ڈی اے ملک بھر میں 14 ہزار پیٹرولیم ڈیلرشپس کی نمائندگی کرتی ہے اور پائیدار معاشی ترقی، کاروباری استحکام اور قومی خوشحالی کے لیے کاروباری تنظیموں کے ساتھ تعاون جاری رکھے گی۔

ان کا کہنا تھا کہ پی پی ڈی اے کاروباری برادری کے مشترکہ مفادات کے تحفظ اور ایف پی سی سی آئی سمیت دیگر تنظیموں سے مثبت روابط مضبوط بنانے کے لیے اپنا کردار ادا کرتی رہے گی۔