ہرمن پریت کور نے بھارتی ویمنز ٹیم کی کپتانی چھوڑ دی

عالمی کپ فاتح کپتان ہرمن پریت کور نے بھارتی ویمنز ٹیم کی تمام فارمیٹس میں قیادت سے دستبردار ہونے کا اعلان کردیا۔

37 سالہ ہرمن پریت کور نے بھارت کی جانب سے 5 ٹیسٹ، 51 ون ڈے اور 155 ٹی20 میچوں میں کپتانی کی۔ ان کی قیادت میں بھارت نے گزشتہ سال اپنی سرزمین پر پہلی بار 50 اوورز کا ورلڈ کپ جیتا۔

کور کی قیادت میں بھارتی ٹیم نے دو ٹی20 ایشیا کپ اور دو ایشین گیمز کے گولڈ میڈلز بھی حاصل کیے، جن میں گزشتہ ماہ آئچی-ناگویا گیمز میں جیتا گیا طلائی تمغہ بھی شامل ہے۔

ہرمن پریت نے سوشل میڈیا پر اپنے بیان میں کہا کہ تمام فارمیٹس میں کپتانی چھوڑنے کا فیصلہ آسان نہیں تھا، کیونکہ اس سے کئی برسوں کی یادیں، جذبات، قربانیاں اور زندگی بھر ساتھ رہنے والے لمحات وابستہ ہیں۔

بھارتی میڈیا کے مطابق انہوں نے یہ فیصلہ بی سی سی آئی کے سیکریٹری دیواجیت سائکیا سے ملاقات کے ایک روز بعد کیا، جس میں ویمنز ٹیم کے مستقبل پر بات چیت ہوئی۔

خواتین کی بین الاقوامی کرکٹ میں سب سے زیادہ میچ کھیلنے والی کھلاڑی بننے والی کور نے واضح کیا کہ وہ بدستور کرکٹ کھیلتی رہیں گی۔ انہوں نے کہا میں نے اس ٹیم کیلئے اپنی پوری صلاحیت صرف کیں اور بھارتی خواتین کرکٹ کی قیادت کا اعزاز ہمیشہ یاد رکھوں گی۔ اب میں دوبارہ کھیل کی محبت کے لیے میدان میں اترنے کے لیے تیار ہوں۔ کپتانی ختم ہوئی ہے، سفر جاری ہے۔