چھوٹے دکانداروں کے لیے خصوصی ٹیکس اسکیم ’ابتدائی مرحلے میں‘، ایف بی آر

وفاقی بورڈ آف ریونیو (ایف بی آر) نے منگل کو کہا ہے کہ چھوٹے دکانداروں کے لیے خصوصی ٹیکس اسکیم پر عمل درآمد ابتدائی مرحلے میں ہے، جس کے دوران بورڈ تاجروں کو سہولت فراہم کرنے اور رجسٹریشن کے عمل میں پیدا ہونے والے عملی یا تکنیکی مسائل کے حل کے لیے سرگرمِ عمل ہے۔

ایف بی آر نے کہا، ’’حکومتِ پاکستان اور ایف بی آر اسکیم پر ہموار، شفاف اور تاجروں کے لیے سہل انداز میں عمل درآمد یقینی بنانے کے لیے تاجروں، مارکیٹ نمائندوں اور تجارتی تنظیموں سے مسلسل رابطے میں ہیں۔ کاروباری برادری سے موصول ہونے والی آرا کو باقاعدہ طور پر مدنظر رکھا جارہا ہے، جبکہ تاجروں کو درپیش حقیقی مشکلات دور کرنے کے لیے بھی کوششیں جاری ہیں۔‘‘

ایف بی آر نے مزید کہا کہ اسکیم کے تحت رجسٹریشن کے دوران کسی تکنیکی دشواری یا مسئلے کا سامنا کرنے والے تاجر براہِ راست ایف بی آر سے رابطہ کرکے معاونت اور رہنمائی حاصل کریں۔

بورڈ نے کہا کہ وہ ضروری سہولت فراہم کرنے کے لیے پُرعزم ہے تاکہ اہل تاجر غیرضروری مشکلات کے بغیر رجسٹریشن کا عمل مکمل کرسکیں۔

ایف بی آر نے کہا، ’’حکومت کا پختہ یقین ہے کہ خصوصی ٹیکس اسکیم چھوٹے دکانداروں کو ایک سادہ اور سہولت پر مبنی نظام کے ذریعے دستاویزی ٹیکس نظام کا حصہ بننے کا موقع فراہم کرتی ہے۔

اس نے کہا، ’’اس اسکیم کا مقصد رضاکارانہ طور پر ٹیکس قوانین پر عمل درآمد کی حوصلہ افزائی کرنا ہے، جبکہ چھوٹے تاجروں کے لیے کاروبار کرنے میں زیادہ یقین دہانی اور سہولت بھی فراہم کرنا ہے۔‘‘