پاکستان کے حمایت یافتہ امیدواروں نے اے سی سی کے اہم عہدے جیت لیے

تھائی لینڈ کے دارالحکومت بینکاک میں ایشین کرکٹ کونسل (اے سی سی) کے سالانہ جنرل اجلاس کے دوران ہونے والے انتخابات میں پاکستان کے حمایت یافتہ امیدواروں نے اہم عہدے حاصل کر لیے، جبکہ ارکان نے افغانستان کو بھی صدارت کے لیے باری کے نظام میں شامل کرنے کی منظوری دے دی۔

اے سی سی کے مطابق ایمریٹس کرکٹ بورڈ کے نائب صدر خالد الزرونی کو متفقہ طور پر کونسل کا نائب صدر منتخب کرلیا گیا۔ قطر، سنگاپور، مالدیپ اور بحرین کے نمائندے 2026-28 کی مدت کے لیے اے سی سی کی ایگزیکٹو بورڈ کے ارکان منتخب ہوگئے۔

اجلاس میں افغانستان کرکٹ بورڈ کو بھی ان مکمل رکن بورڈز میں شامل کرنے کی منظوری دی گئی جو اے سی سی کی صدارت سنبھالنے کے اہل ہیں۔ اس سے قبل صدارت پاکستان، بنگلہ دیش، سری لنکا اور بھارت کے درمیان باری باری منتقل ہوتی رہی ہے۔

اے سی سی کے صدر محسن نقوی نے کہا کہ یہ فیصلے ایشیا بھر میں کرکٹ کی مجموعی ترقی اور انتظامی امور کو مزید مستحکم بنانے کے لیے کونسل کے عزم کی عکاسی کرتے ہیں۔

اے سی سی کے تمام رکن ممالک کے نمائندوں کی شرکت سے ہونے والے اجلاس میں گورننس، انتظامی امور، کرکٹ کی ترقی، مقابلوں اور مالیات سے متعلق کمیٹیوں کی بھی منظوری دی گئی۔