روس کے یوکرین پر حملے، 13 افراد ہلاک، پولینڈ نے لڑاکا طیارے فضا میں روانہ کردیے

روسی فضائی حملوں میں جمعرات کو یوکرین میں کم از کم 13 افراد ہلاک ہوگئے جن میں دارالحکومت کیف کا ایک شہری بھی شامل ہے۔ حملوں کا دائرہ مغربی شہر لیوو تک پھیل گیا جس کے بعد پڑوسی ملک پولینڈ نے اپنی فضائی حدود کے تحفظ کے لیے لڑاکا طیارے فوری طور پر روانہ کردیے۔

یہ حملے ایسے وقت میں ہوئے ہیں جب صدر ولودیمیر زیلنسکی امریکا کے دورے سے واپس آئے ہیں جہاں انہوں نے کہا تھا کہ امریکی صدر ڈونلڈ ٹرمپ نے یوکرین کو پیٹریاٹ میزائلوں کے لیے لائسنس فراہم کرنے پر اتفاق کیا ہے۔

یوکرین کے بیشتر علاقوں میں فضائی حملوں کے انتباہی سائرن بجائے گئے جبکہ رائٹرز کے ایک نمائندے کے مطابق دارالحکومت کیف میں دھماکوں کی آوازیں سنی گئیں۔

میئر وٹالی کلِچکو نے ٹیلی گرام پیغام رسانی ایپ پر بتایا کہ چند غیر رہائشی مقامات پر آگ لگ گئی۔

ہنگامی خدمات کے مطابق دارالحکومت میں ایک شخص ہلاک اور دو دیگر زخمی ہوئے جبکہ دنیپروپیٹرووسک اور پولتاوا کے علاقوں میں مزید چھ افراد جن میں دو بچے بھی شامل ہیں مارے گئے۔

زیلنسکی کے آبائی شہر وسطی کریوی ریہ میں ہلاک ہونے والے چھ افراد میں 5 اور 12 سال کی دو بچیاں بھی شامل تھیں۔ شہر کی دفاعی کونسل کے سربراہ اولیکساندر ویلکول کے مطابق یہ ایک روسی اسکندر-ایم بیلسٹک میزائل کا براہِ راست حملہ تھا جس میں آٹھ افراد زخمی بھی ہوئے۔

ویلکول نے ٹیلی گرام پر کہا کہ یہ ایک تاریک رات ہے۔ انہوں نے بتایا کہ روس کے علاقے وورونیز سے داغا گیا میزائل ایک بڑے خاندان کے گھر پر گرا، ملبہ ہٹانے کے بعد ہلاکتوں کی تعداد میں اضافہ ہوسکتا ہے۔

پولینڈ کے قریب واقع شہر لیوو میں حکام کے مطابق روسی میزائلوں سے دو رہائشی عمارتوں کو نقصان پہنچنے اور 26 افراد کے زخمی ہونے کے بعد امدادی کارکن ملبہ ہٹا کر پھنسے ہوئے افراد تک پہنچنے کی کوشش کررہے تھے۔

اس سے قبل زیلنسکی نے خبردار کیا تھا کہ روس کی جانب سے ایک بڑا حملہ متوقع ہے اور کہا تھا کہ یوکرینی شہریوں کا تحفظ اتحادی ممالک کی جانب سے میزائل دفاعی نظام فراہم کرنے کی آمادگی پر منحصر ہے۔

روس کی وزارتِ دفاع نے جمعرات کو کہا کہ اس کی افواج نے یوکرین بھر میں ان مقامات کو نشانہ بنایا جنہیں وہ فوجی تنصیبات قرار دیتی ہے۔ ان حملوں کا دائرہ دارالحکومت کیف سے لے کر لیوو اور دنیپروپیٹرووسک تک پھیلا ہوا تھا جبکہ تین مال بردار جہازوں کو بھی نشانہ بنایا گیا۔