پیٹرول 3 روپے 66 پیسے، ڈیزل 4 روپے 80 پیسے فی لیٹر مہنگا
- پیٹرولیم مصنوعات کی نئی قیمتوں کا اطلاق آج رات 12 بجے سے ہوگا
وفاقی حکومت نے جمعہ کو نظرثانی شدہ یومیہ پیٹرولیم قیمتوں کے طریقہ کار کے تحت 25 جولائی کیلئے پیٹرول اور ہائی اسپیڈ ڈیزل (ایچ ایس ڈی) کی قیمتوں میں اضافہ کر دیا۔
وزارتِ توانائی (پیٹرولیم ڈویژن) کی جانب سے جاری نوٹیفکیشن کے مطابق آئل اینڈ گیس ریگولیٹری اتھارٹی (اوگرا) نے 25 جولائی سے پیٹرولیم مصنوعات کی ڈپو سے فروخت کی نئی قیمتوں کا اعلان کر دیا ہے۔
نوٹیفکیشن کے مطابق موٹر اسپرٹ (پیٹرول) کی قیمت میں 3 روپے 66 پیسے فی لیٹر اضافہ کیا گیا ہے، جس کے بعد نئی قیمت 335 روپے 18 پیسے فی لیٹر ہوگئی ہے، جو پہلے 331 روپے 52 پیسے تھی۔
اسی طرح ہائی اسپیڈ ڈیزل (ایچ ایس ڈی) کی قیمت میں 4 روپے 80 پیسے فی لیٹر اضافہ کیا گیا ہے، جس کے بعد اس کی نئی قیمت 383 روپے 46 پیسے فی لیٹر ہوگئی ہے، جبکہ پہلے یہ 378 روپے 66 پیسے فی لیٹر تھی۔
یہ اضافہ ایسے وقت میں کیا گیا ہے جب حکومت کی جانب سے متعارف کرائے گئے نظرثانی شدہ نظام کے تحت عالمی منڈی میں خام تیل کی قیمتوں میں اتار چڑھاؤ کے مطابق پاکستان میں پیٹرولیم مصنوعات کی قیمتوں کا روزانہ جائزہ لیا جا رہا ہے۔
نظرثانی شدہ قیمتوں کا اطلاق 25 جولائی 2026ء سے، یعنی آج رات 12 بجے سے ہوگا۔
Comments