ماری انرجیز نے پیٹروسن جی ایس پی اے کی منسوخی سے متعلق دعووں کو مسترد کر دیا

پاکستان کی سب سے بڑی تیل و گیس کی تلاش اور پیداوار (ای اینڈ پی) کی کمپنیوں میں سے ایک ماری انرجیز نے پیٹروسن سی این جی (پرائیویٹ) لمیٹڈ کے ساتھ اپنے گیس کی خرید و فروخت کے معاہدے (جی ایس پی اے) کو غلط طریقے سے منسوخ کرنے کے الزامات کو مسترد کر دیا ہے۔

کمپنی نے کہا ہے کہ اس کے موقف کو پاکستانی عدالتوں کی جانب سے مسلسل درست تسلیم کیا گیا ہے اور یہ معاملہ فی الوقت انٹرنیشنل چیمبر آف کامرس (آئی سی سی) کی برائے نام خفیہ ثالثی کی کارروائی کا حصہ ہے۔اسٹاک ایکسچینج میں درج (لسٹڈ) ای اینڈ پی کمپنی نے پاکستان اسٹاک ایکسچینج (پی ایس ایکس) کو بھیجے گئے ایک نوٹس میں اس پیش رفت سے آگاہ کیا۔ماری انرجیز نے وضاحت کرتے ہوئے کہا کہ ماری انرجیز لمیٹڈ پیٹروسن کے ساتھ معاہدے کو غلط طور پر منسوخ کرنے کے تمام الزامات کی سختی سے تردید کرتی ہے۔ یہ بات ریکارڈ کا حصہ ہے کہ معاہدے کی رو سے پیٹروسن کے پاس ایک درست لائسنس ہونا ضروری تھا، جبکہ معاہدے کی منسوخی کی تاریخ تک پیٹروسن کے پاس درست لائسنس موجود نہیں تھا۔

یہ وضاحت پیٹروسن سی این جی (پرائیویٹ) لمیٹڈ کے ساتھ جی ایس پی اے کی منسوخی اور اس کے بعد آئی سی سی کی ثالثی کارروائی سے متعلق حالیہ میڈیا رپورٹس کے جواب میں سامنے آئی ہے۔کمپنی کا کہنا ہے کہ اس کے موقف کی پاکستانی عدالتوں نے بارہا توثیق کی ہے اور فی الوقت اس کے خلاف کوئی منفی آرڈر یا فیصلہ نافذ العمل نہیں ہے۔کمپنی نے مزید کہا کہ متعلقہ عدالتی کارروائیوں میں ماری انرجیز کا اپنایا گیا موقف پہلے سے ہی ریکارڈ کا حصہ ہے اور مزید کہا کہ فی الحال جاری ثالثی کی کارروائی قانوناً خفیہ نوعیت کی ہے۔نوٹس کے اختتام میں کہا گیا کہ ماری انرجیز کو پورا اعتماد ہے کہ اس کارروائی میں بھی اس کا موقف درست ثابت ہوگا اور وہ بَری الذمہ قرار پائے گی۔

ماری انرجیز تیل و گیس کی تلاش اور پیداوار سے منسلک ایک مربوط کمپنی ہے، جس کی کامیابی کی شرح تقریباً 70 فیصد ہے، جو قومی سطح کی اوسطاً 33 فیصد اور بین الاقوامی سطح کی 14 فیصد اوسط سے کہیں زیادہ ہے۔

ماری انرجیز کے اہم صارفین میں کھاد بنانے والے کارخانے، بجلی پیدا کرنے والی کمپنیاں، گیس کی تقسیم کار کمپنیاں اور آئل ریفائنریز شامل ہیں۔