یمنی حوثیوں کا سعودی عرب کے خلاف بحری ناکہ بندی کا اعلان

یمن کے حوثی باغیوں نے سعودی عرب کے خلاف فوری طور پر بحری ناکہ بندی کا اعلان کر دیا ہے۔ گروپ کے عسکری ترجمان نے ایک ٹیلی ویژن خطاب میں اس فیصلے کا باضابطہ اعلان کیا۔

حوثیوں نے اپنے بیان میں کہا کہ وہ مجرم سعودی دشمن کے خلاف ”آنکھ کے بدلے آنکھ“ کے اصول کے تحت بحری پابندی (امبارگو) کا اعلان کرتے ہیں، جس کا اطلاق اس بیان کے جاری ہونے کے فوراً بعد سے ہوگا۔حوثیوں کا دعویٰ ہے کہ یہ ناکہ بندی سعودی عرب کی جانب سے گزشتہ تقریباً 12 برسوں سے ”ہمارے عزیز لوگوں پر جاری ظالمانہ اور جابرانہ محاصرے، ہمارے وسائل کی لوٹ مار اور ہماری بندرگاہوں اور ہوائی اڈوں پر زمین، سمندر اور فضا کے راستے عائد جامع ناکہ بندی“ کا جواب ہے۔

حوثی گروپ نے گزشتہ ہفتے سعودی عرب پر اس وقت میزائل داغے تھے جب انہوں نے مملکت پر اپنے زیرِ کنٹرول ایک ہوائی اڈے پر بمباری کرنے کا الزام عائد کیا تھا، جس سے دونوں فریقین کے درمیان گزشتہ چار سال سے جاری جنگ بندی کا خاتمہ ہو گیا۔ مارچ 2022ء میں سعودی توانائی کی تنصیبات پر حوثی حملوں کے بعد ہونے والی غیر رسمی جنگ بندی کے بعد سے یہ حوثیوں کی جانب سے سعودی عرب کے خلاف پہلا باضابطہ حملہ تھا۔