لبنان : اسرائیلی انخلا کے حکم کے بعد صور پر مہلک فضائی حملہ، 8 افراد جاں بحق

جنوبی لبنان کے تاریخی ساحلی شہر صور پر منگل کو اسرائیل کے ایک ہولناک فضائی حملے میں کم از کم 8 افراد جاں بحق ہو گئے۔

لبنانی وزارتِ صحت اور سرکاری میڈیا کے مطابق یہ حملہ اسرائیل کی جانب سے پہلی بار پورے شہر کو خالی کرنے کے حکم کے بعد مشرقی کنارے پر کیا گیا، جو 2 مارچ کو حزب اللہ اور اسرائیل کے درمیان جنگ شروع ہونے کے بعد سے اب تک کا مہلک ترین حملہ ہے۔ حملے کے بعد امدادی ٹیمیں ملبے تلے دبے افراد کو نکالنے میں مصروف ہیں۔

اسرائیلی فوج نے منگل کی صبح آن لائن وارننگ جاری کرتے ہوئے عیسائی اکثریتی علاقے سمیت پورے شہر کو فوری خالی کرنے کا حکم دیا تھا، جہاں دیگر علاقوں سے آئے پناہ گزین مقیم تھے۔ اسرائیل کا دعویٰ ہے کہ حزب اللہ کے جنگجو اس علاقے میں چھپے ہوئے ہیں۔

اس صورتحال کے پیشِ نظر ڈاکٹرز ود آؤٹ بارڈرز (ایم ایس ایف) نے اسرائیلی اقدام کو شدید تشویشناک اور جبری نقل مکانی قرار دیتے ہوئے علاقے کے کئی اسپتالوں اور موبائل کلینکس میں اپنی سرگرمیاں معطل کر دی ہیں۔ یاد رہے کہ 16 اپریل کو امریکہ کی جانب سے جنگ بندی کے اعلان کے باوجود تادمِ تحریر جنوبی لبنان میں لڑائی اور اسرائیلی بمباری کا سلسلہ جاری ہے، جس کے باعث ملک کا پانچواں حصہ خالی ہو چکا ہے۔