کراچی میں طویل لوڈشیڈنگ، نیپرا نے کے الیکٹرک سے رپورٹ طلب کرلی

نیشنل الیکٹرک پاور ریگولیٹری اتھارٹی (نیپرا) نے کراچی میں طویل اور غیر اعلانیہ لوڈشیڈنگ پر سخت نوٹس لیتے ہوئے کے-الیکٹرک کی انتظامیہ سے تفصیلی رپورٹ طلب کر لی ہے۔

یہ معاملہ اپریل 2026 کے فیول چارجز ایڈجسٹمنٹ (ایف سی اے) سے متعلق عوامی سماعت کے دوران سامنے آیا، جس میں سینٹرل پاور پرچیزنگ ایجنسی (سی پی پی اے-جی) نے 1.73 روپے فی یونٹ اضافے کی درخواست کی تاکہ 16.03 ارب روپے کی وصولی ممکن بنائی جا سکے۔ ادارے نے بتایا کہ ہائیڈل پیداوار میں کمی، مشرقِ وسطیٰ تنازع کے باعث آر ایل این جی کی عدم دستیابی، کوئلے سے بجلی کی پیداوار میں کمی اور کینپ-3 میں خرابی کے باعث پیداوار متاثر ہوئی۔

اجلاس میں حکام نے بتایا کہ نسبتاً کم ایف سی اے کی بڑی وجہ مقامی گیس کی راشننگ، ہائیڈل پیداوار اور لوڈشیڈنگ کے کم دورانیے تھے۔

سماعت کے دوران ڈائریکٹر جنرل کنزیومر افیئرز ڈویژن نوید الٰہی شیخ نے کہا کہ شدید گرمی کے باوجود کے الیکٹرک غیر اعلانیہ اور طویل لوڈشیڈنگ کر رہا ہے اور طے شدہ شیڈول کی پاسداری نہیں کی جا رہی۔ انہوں نے کہا کہ مختلف علاقوں سے شکایات موصول ہوئی ہیں، جبکہ فالٹس کی بروقت درستگی نہ ہونے سے صارفین کو شدید مشکلات کا سامنا ہے۔

نیپرا نے قرار دیا کہ یوٹیلیٹی مقررہ اوقات کی پابندی نہیں کر رہی اور گرمی کے موسم میں غیر ضروری لوڈشیڈنگ بڑھا رہی ہے۔ اتھارٹی نے کے-الیکٹرک کو ہدایت دی کہ وہ لوڈشیڈنگ کے طریقہ کار اور لو-لاس و ہائی-لاس ٹائمنگ کی خلاف ورزی پر جامع رپورٹ جمع کرائے۔

سماعت میں کراچی چیمبر آف کامرس اینڈ انڈسٹری (کے سی سی آءی) کے نمائندے تنویر بری نے بھی نیپرا سے کے-الیکٹرک کے خلاف سخت کارروائی کا مطالبہ کیا۔

سی ای او سی پی پی اے-جی ریحان اختر نے بتایا کہ اپریل میں خطے کی کشیدگی کے باعث توانائی کی فراہمی متاثر ہوئی اور اس دوران درآمدی ایل این جی دستیاب نہیں تھی۔ انہوں نے کہا کہ حکومت نے مقامی گیس کو آر ایل این جی پاور پلانٹس کی طرف موڑا جس سے فیول چارجز میں کچھ ریلیف ملا۔

سی پی پی اے-جی کے مطابق اپریل میں مجموعی بجلی کی کھپت میں 8.5 فیصد کمی ریکارڈ کی گئی، جبکہ صنعتی شعبے کی کھپت میں اضافہ دیکھا گیا۔ ادارے نے بتایا کہ اگلے دو ماہ کے لیے گیس اور بجلی کی فراہمی کی منصوبہ بندی مکمل کر لی گئی ہے۔

کے-الیکٹرک کے ترجمان نے کہا ہے کہ ادارہ نیپرا کی ہدایات پر مکمل عمل کرے گا اور رپورٹ جمع کرائے گا۔ ترجمان کے مطابق لوڈشیڈنگ نیشنل الیکٹرک پالیسی کے مطابق کی جا رہی ہے جبکہ شہری ترقیاتی کاموں کے باعث مقامی فالٹس بھی رپورٹ ہو رہے ہیں، جنہیں جلد دور کیا جا رہا ہے۔

کاپی رائٹ بزنس ریکارڈر، 2026