شمالی کوریا نے جدید جنگی اے آئی گائیڈڈ میزائل اور راکٹ سسٹمز کا تجربہ کرلیا، کے سی این اے کا دعویٰ

شمالی کوریا نے رہنما کم جونگ اُن کی نگرانی میں حکمتِ عملی پر مبنی بیلسٹک میزائلوں، توپ خانے کے راکٹوں اور مصنوعی ذہانت سے رہنمائی حاصل کرنے والے درست نشانے والے کروز میزائلوں کے امتزاج کا تجربہ کیا ہے۔ یہ رپورٹ سرکاری خبر رساں ادارے کے سی این اے نے بدھ کے روز دی ہے۔

رپورٹ کے مطابق شمالی کوریا طویل فاصلے تک مار کرنے والے بیلسٹک میزائلوں اور جوہری صلاحیتوں میں پیش رفت کے بعد اب اپنے حکمتِ عملی اور روایتی ہتھیاروں کے نظام کو مسلسل جدید بنا رہا ہے اور ان ہتھیاروں کو جنوبی کوریا کی سرحد کے قریب نصب کرنے کا اعلان بھی کر چکا ہے۔

ان تجربات میں حکمتِ عملی پر مبنی بیلسٹک میزائلوں پر نصب ”خصوصی مشن وار ہیڈ“ کی طاقت، طویل فاصلے تک مار کرنے والے ملٹی لانچ راکٹ سسٹمز کی قابلِ اعتماد کارکردگی اور مصنوعی ذہانت سے رہنمائی حاصل کرنے والے ٹیکٹیکل کروز میزائلوں کی درستگی کا جائزہ لیا گیا۔

کم جونگ اُن کے مطابق یہ تجربات اس بات کا ثبوت ہیں کہ ہتھیاروں اور خودکار لانچنگ نظام کو کامیابی سے اس حد تک اپ گریڈ کیا گیا ہے کہ وہ جدید جنگی تقاضوں سے ہم آہنگ ہو کر مؤثر جنگی استعمال کے قابل ہو چکے ہیں۔

انہوں نے مزید کہا کہ خاص طور پر کروز میزائلوں کی جنگی تیاری کی تصدیق ہوئی ہے، جنہیں جنوبی کوریا کی سرحد کے قریب توپ خانے کے یونٹس میں تعینات کیا جائے گا۔ یہ میزائل درست نیویگیشن اور اے آئی گائیڈڈ کنٹرول کے ذریعے 100 کلومیٹر تک کے اہداف کو نشانہ بنانے کی صلاحیت رکھتے ہیں۔

جنوبی کوریا کا گنجان آباد دارالحکومت سیئول شمالی کوریا کی سرحد سے 100 کلومیٹر کے اندر واقع ہے، جہاں سے اسے علیحدہ کرنے والی غیر عسکری زون ( ڈی ایم زیڈ) کے بارے میں پیانگ یانگ اسے اپنا “بنیادی دشمن” قرار دیتا رہا ہے اور مستقبل میں اتحاد کی پالیسی سے بھی دستبردار ہو چکا ہے۔

ماہرین کے مطابق کروز میزائل کے مبینہ ٹرمینل گائیڈنس سسٹم میں پہلی مرتبہ شمالی کوریا کی جانب سے عوامی طور پر یہ اشارہ دیا گیا ہے کہ اس نے میزائلوں میں مصنوعی ذہانت (اے آئی ) شامل کی ہے—ایک ایسی ٹیکنالوجی جو حقیقی وقت کے ڈیٹا کی مدد سے ہدف کی نشاندہی اور اسے لاک کرتی ہے۔

اس حوالے سے عسکری ماہر ینگ ووک نے کہا کہ ”یہ دراصل اے آئی کے ذریعے ہدف کی شناخت اور میزائل کی رہنمائی کا عمل ہے۔“ ان کے مطابق شمالی کوریا پہلے بھی ڈرونز میں اے آئی ٹیکنالوجی کے استعمال کا دعویٰ کر چکا ہے۔

کوریا انسٹی ٹیوٹ فار نیشنل یونیفیکیشن کے محقق ہونگ من کا کہنا ہے کہ ممکن ہے یہ دعویٰ موجودہ ڈیجیٹل گائیڈنس سسٹم کے بہتر ورژن اور آٹومیٹک ٹارگٹ ریکگنیشن ٹیکنالوجی کے امتزاج پر مبنی ہو، تاہم اس کی حقیقی پیچیدگی کا آزادانہ طور پر تعین ممکن نہیں۔

رپورٹس کے مطابق شمالی کوریا نے 2023 کے آخر سے روس کو بیلسٹک میزائل اور توپ خانے کے راکٹ فراہم کیے ہیں، جو یوکرین جنگ میں استعمال ہو رہے ہیں، جس سے پیانگ یانگ کو میدانِ جنگ سے قیمتی ڈیٹا حاصل ہونے کا امکان ظاہر کیا جا رہا ہے۔

جنوبی کوریا کی فوج نے منگل کے روز کہا تھا کہ اس نے متعدد میزائلوں کی لانچنگ کا سراغ لگایا ہے، جن میں ایک بیلسٹک میزائل بھی شامل تھا۔