ڈیجیٹل معیشت کا فروغ: سمیڈا اور علی بابا گروپ کے درمیان مفاہمتی یادداشت پر دستخط
- ایس ایم ایز کی ڈیجیٹل منتقلی کیلئے جامع اقدامات کررہی ہے، ہارون اختر خان
وزیراعظم کے معاون خصوصی ہارون اختر کی موجودگی میں اسمال اینڈ میڈیم انٹرپرائزز ڈیولپمنٹ اتھارٹی (سمیڈا) نے علی بابا گروپ کے ساتھ ایک مفاہمتی یادداشت پر دستخط کیے، جس کا مقصد پاکستان کے ایس ایم ایز کے لیے ڈیجیٹل تجارت کو فروغ دینا اور انہیں عالمی منڈیوں تک رسائی کو وسعت دینا ہے۔
اس موقع پر ہارون اختر خان نے کہا کہ وزیر اعظم کے وژن کے مطابق حکومت چھوٹے اور درمیانے درجے کے کاروباری شعبے کی ڈیجیٹل منتقلی کیلئے جامع اقدامات کررہی ہے۔ انہوں نے واضح کیا کہ ای کامرس پلیٹ فارمز کے ذریعے پاکستانی کاروبار کو بین الاقوامی منڈیوں سے جوڑنا حکومت کی اولین ترجیحات میں شامل ہے۔
انہوں نے مزید کہا کہ علی بابا گروپ کے ساتھ یہ اشتراک نوجوانوں، کاروباری افراد (انٹرپرینیورز) اور اسٹارٹ اپس کے لیے نئے مواقع پیدا کرے گا جبکہ اس سے پاکستان میں برآمدات کے فروغ اور ڈیجیٹل تجارت کو بڑھانے میں بھی مدد ملے گی۔
ہارون اختر خان نے اس بات پر زور دیا کہ ایس ایم ای سیکٹر ملکی معیشت میں ریڑھ کی ہڈی کی حیثیت رکھتا ہے اور حکومت کاروبار دوست پالیسیوں کے ذریعے سرمایہ کاری، برآمدات اور صنعتی ترقی کو فروغ دینے کے لیے مکمل عزم کا اظہار کرتی ہے۔
انہوں نے سمیڈا اور علی بابا گروپ کے درمیان اس شراکت داری کو پاکستان کی ڈیجیٹل معیشت کو مضبوط بنانے اور بین الاقوامی کاروباری رابطوں کو بڑھانے کی جانب ایک اہم قدم قرار دیا۔
معاہدے پر دستخط کی اس تقریب میں سیکریٹری صنعت و پیداوار سیف انجم اور ایڈیشنل سیکریٹری صنعت و پیداوار بھی موجود تھے۔
کاپی رائٹ بزنس ریکارڈر 2026
Comments