پی ایس ایکس میں آئی پی او: وحدت پولٹری کے حصص کی قیمت 50 فیصد اضافے کے بعد 18 روپے فی حصص تک پہنچ گئی

وحدت پولٹری فارم لمیٹڈ کے حصص کی قیمت پاکستان اسٹاک ایکسچینج (پی ایس ایکس) میں دو روزہ ڈچ بڈنگ (بک بلڈنگ) کے پہلے روز منگل کو زیادہ سے زیادہ 50 فیصد اضافے کے ساتھ 18 روپے فی حصص کی بالائی حد تک پہنچ گئی، یہ بات حصص کے اجرا کے لیڈ منیجر ٹاپ لائن سیکیورٹیز نے بتائی ہے۔

بولی کا آغاز کم از کم مقررہ (فلور) قیمت 12 روپے فی حصص سے ہوا تھا۔

بک بلڈنگ کا عمل بدھ (22 اپریل) کو مکمل ہوگا۔

18 روپے فی حصص کی طے شدہ اسٹرائیک پرائس پر کمپنی 5 کروڑ 31 لاکھ حصص فروخت کر کے مجموعی طور پر 95 کروڑ 58 لاکھ 40 ہزار روپے حاصل کرے گی، جبکہ اگر یہی حصص فلور پرائس 12 روپے پر فروخت ہوتے تو کم از کم ہدف 63 کروڑ 72 لاکھ 30 ہزار روپے بنتا۔

مقرر کردہ 5 کروڑ 31 لاکھ حصص میں سے کمپنی نے اعلان کیا ہے کہ 70 فیصد حصص بک بلڈنگ کے ذریعے ادارہ جاتی سرمایہ کاروں اور ہائی نیٹ ورتھ افراد کو منگل اور بدھ کے روز فروخت کیے جائیں گے۔

بعد ازاں اگلے ہفتے باقی 30 فیصد حصص ریٹیل سرمایہ کاروں کو 27 اور 28 اپریل 2026 کو اسی اسٹرائیک پرائس پر فروخت کیے جائیں گے۔

ٹاپ لائن سیکیورٹیز کے سی ای او محمد سہیل نے ٹیکسٹ پیغام میں بتایا کہ وحدت پولٹری کے آئی پی او کو سرمایہ کاروں کی جانب سے غیر معمولی دلچسپی حاصل ہوئی ہے۔

ان کے مطابق بک بلڈنگ پانچ گنا اوورسبسکرائب ہوئی۔

انہوں نے کہا کہ آئی پی او کے پہلے ہی روز سرمایہ کاروں نے مجموعی طور پر 18 کروڑ 22 لاکھ 20 ہزار حصص کے لیے دلچسپی ظاہر کی، جبکہ پیش کردہ حجم 3 کروڑ 71 لاکھ 70 ہزار حصص تھا۔

ان کا کہنا تھا کہ یہ بات واضح ہے کہ سرمایہ کاروں نے کمپنی کی ترقی کی حکمتِ عملی اور انتظامی صلاحیت پر بھرپور اعتماد کا اظہار کیا ہے۔

وحدت پولٹری فارم کی آئی پی او پراسپیکٹس کے مطابق حاصل ہونے والی رقم نئے پاسچرائزیشن پلانٹ کے قیام، اضافی پولٹری ریوڑ کی افزائش، اور معیاری سپلائی چین کے لیے ورکنگ کیپیٹل بڑھانے پر خرچ کی جائے گی۔

“اس اجراء کا بنیادی مقصد سرمایہ کاری مؤثر ماڈل کے ذریعے پیداواری صلاحیت میں اضافہ کرنا، اضافی ورکنگ کیپیٹل کی ضروریات کو پورا کرنا، اور ایک نئی پاسچرائزڈ انڈے کی پیداوار یونٹ کے ذریعے زیادہ ویلیو والے شعبوں میں توسیع کرنا ہے۔“

اس سے قبل برکت فریشین ایگرو لمیٹڈ، جو انڈوں کی پراسیسنگ کے شعبے کی ایک اور کمپنی ہے، فروری 2025 میں پاکستان اسٹاک ایکسچینج (پی ایس ایکس) میں لسٹ ہوئی تھی۔ اس کمپنی نے 67 کروڑ 74 لاکھ حصص کی فروخت کے ذریعے پی ایس ایکس میں مجموعی طور پر 1.23 ارب روپے اکٹھے کیے تھے۔