ڈار کی عمدہ کارکردگی اور ہیزل ووڈ کی واپسی، بنگلورو کا بولنگ یونٹ مزید مضبوط

جوش ہیزل ووڈ کی واپسی اور راسخ ڈار کی شاندار کارکردگی نے رائل چیلنجرز بنگلورو کے بولنگ یونٹ کو نئی زندگی بخش دی ہے۔ دفاعی چیمپئن بنگلورو نے بدھ کو لکھنؤ سپر جائنٹس کو پانچ وکٹوں سے ہرا کر پوائنٹس ٹیبل پر راجستھان رائلز کے برابر آٹھ پوائنٹس حاصل کر لیے ہیں، تاہم بہتر نیٹ رن ریٹ کی بدولت وہ ٹاپ پوزیشن پر پہنچ گئے ہیں۔

اگرچہ ویرات کوہلی 228 رنز کے ساتھ سیزن کے ٹاپ اسکورر ہیں، لیکن بنگلورو کی حالیہ فتوحات میں ان کے بولنگ یونٹ کا کلیدی کردار رہا ہے۔ نائب کپتان جیتیش شرما کے مطابق ہیزل ووڈ انجری سے صحت یاب ہو کر اب پہلے سے زیادہ فٹ اوربہتر نظر آ رہے ہیں۔

اس تجربہ کار بولر کے ساتھ نوجوان راسخ ڈار نے بھی اپنی صلاحیتوں کا لوہا منوایا ہے۔ لکھنؤ کے خلاف میچ میں راسخ ڈار نے 24 رنز دے کر 4 وکٹیں حاصل کیں، جبکہ ہیزل ووڈ نے انتہائی نپی تلی بولنگ کرتے ہوئے صرف 20 رنز دیے۔

جیتیش شرما نے ڈار کی محنت کو سراہتے ہوئے کہا کہ انہوں نے یارکرز اور سلو گیندوں پر کافی کام کیا ہے، جس کا نتیجہ دباؤ والے حالات میں بہترین کارکردگی کی صورت میں سامنے آیا ہے۔ کرنال پانڈیا نے بھی مڈل اوورز میں بہترین کنٹرول فراہم کر کے ٹیم کی فتح میں حصہ ڈالا۔