یو اے ای میں میزائل انٹرسیپشن کے دوران ’گرنے والے ملبے‘ سے چوتھا پاکستانی جاں بحق

ابوظہبی میں حکام اور میڈیا رپورٹس کے مطابق ایک اور پاکستانی شہری سمیت دو افراد اس وقت جاں بحق ہوئے جب ایک کامیابی سے روکے گئے بیلسٹک میزائل کے گرنے والے ملبے نے سویحان اسٹریٹ کو نشانہ بنایا گیا۔

ابوظہبی میڈیا آفس کے مطابق یہ واقعہ فضائی دفاعی نظام کی جانب سے میزائل کو روکنے کے بعد پیش آیا، جس کے نتیجے میں دو افراد جاں بحق، تین زخمی اور متعدد گاڑیوں کو نقصان پہنچا۔ ابتدائی طور پر متاثرین کی شناخت ظاہر نہیں کی گئی۔

تاہم یو اے ای کی میڈیا رپورٹس میں دعویٰ کیا گیا کہ جاں بحق افراد میں ایک پاکستانی اور ایک بھارتی شہری شامل تھا۔ ہنگامی امدادی ٹیموں نے فوری طور پر کارروائی کی، جبکہ حکام نے عوام سے اپیل کی کہ وہ صرف سرکاری ذرائع پر انحصار کریں اور غیر مصدقہ معلومات پھیلانے سے گریز کریں۔

متحدہ عرب امارات میں پاکستانی سفارتخانے نے بعد ازاں پاکستانی شہری کی ہلاکت کی تصدیق کرتے ہوئے گہرے دکھ اور افسوس کا اظہار کیا اور سوگوار خاندان سے تعزیت اور یکجہتی کا اظہار کیا۔

سفارتخانے نے کہا ہے کہ وہ مقامی حکام کے ساتھ تعاون کر رہا ہے تاکہ مدد فراہم کی جا سکے اور مرحوم کی وطن واپسی کو آسان بنایا جا سکے۔

حالیہ واقعہ متحدہ عرب امارات میں پاکستانی شہریوں کی اسی نوعیت کی ہلاکتوں کی ایک سیریز میں شامل ہے، جو جاری علاقائی کشیدگی کے دوران پیش آئی ہیں۔

17 مارچ کو ایک پاکستانی شہری میزائل انٹرسیپشن کے بعد گرنے والے ملبے سے جاں بحق ہوا۔

اس سے پہلے، 8 مارچ کو دبئی کے علاقے البرشا میں ایک پاکستانی ڈرائیور اس وقت ہلاک ہوا جب فضائی انٹرسیپشن کے ملبے نے گاڑی کو نشانہ بنایا۔

ایک اور پاکستانی شہری، جن کی شناخت مرید زمان کے نام سے ہوئی، 28 فروری کو ابوظہبی میں اسی نوعیت کے واقعے میں جاں بحق ہوا، جس دن امریکہ اور اسرائیل کی ایران پر کارروائی کے بعد تنازع شروع ہوا تھا۔