ٹی ٹوئنٹی ورلڈ کپ : پاکستان آج سری لنکا کے خلاف کھیلے گا، سیمی فائنل کی امیدیں برقرار

آئی سی سی ٹی ٹوئنٹی ورلڈ کپ کے سپرایٹ مرحلے میں پاکستان اپنا آخری میچ آج سری لنکا کے خلاف کھیلے گا۔ پالےکیلے میں شیڈول مقابلہ آج شام ساڑھے 6 بجے شروع ہوگا۔

سپر ایٹ مرحلے میں انگلینڈ کیخلاف نیوزی لینڈ کی شکست کے بعد پاکستان کی سیمی فائنل میں رسائی کے لئے راہ نکل آئی ہے۔

پالے کیلے میں شیڈول میچ میں سری لنکا کے خلاف فتح کے بعد پاکستان اور نیوزی لینڈ کے پوائنٹس برابر ہو جائیں گے جس کے بعد فیصلہ نیٹ رن ریٹ پر ہوگا۔

نیٹ رن ریٹ کو بہتر بنانے کے لیے پاکستان کو سری لنکا کے خلاف 64 یا زائد رنز سے فتح حاصل کرنی ہوگی جبکہ دوسری بیٹنگ کی صورت میں پاکستان کو ہدف کا تعاقب 13.1 اوورز میں کرنا ہوگا۔

واضح رہے کہ انگلینڈ اور نیوزی لینڈ کے درمیان کولمبو میں کھیلے گئے میچ میں کیویز کو انگلینڈ کے خلاف چار وکٹوں سے شکست کا سامنا کرنا پڑا ہے۔

یاد رہے کہ سری لنکن ٹیم پہلے ہی سیمی فائنل کی دوڑ سے باہر ہوچکی ہے۔

سری لنکا کے خلاف اہم معرکے سے قبل قومی کرکٹ ٹیم نے پالے کیلے انٹرنیشنل کرکٹ اسٹیڈیم میں بھرپور پریکٹس سیشن کیا جہاں کھلاڑیوں نے کوچز کی زیر نگرانی بیٹنگ، بالنگ اور فیلڈنگ پر خصوصی توجہ دی۔