ای سی سی نے ای سی پی گرانٹ کی درخواست موخر کر دی، اسکالرشپ اور ریلیف کے لیے ایک ارب روپے کی منظوری

کابینہ کی اقتصادی رابطہ کمیٹی (ای سی سی) نے منگل کے روز الیکشن کمیشن آف پاکستان (ای سی پی) کی بلدیاتی انتخابات کے لیے 4.55 ارب روپے کی درخواست موخر کر دی، جبکہ متعدد تکنیکی ضمنی گرانٹس اور ریلیف الاٹمنٹس کی منظوری دے دی ہے۔

وفاقی وزیر خزانہ و ریونیو سینیٹر محمد اورنگزیب کی زیرصدارت اجلاس وزارتِ خزانہ میں ہوا۔

ای سی سی نے ای سی پی کی جانب سے جمع کرائی گئی سمری پر غور کیا، جس میں پنجاب، اسلام آباد کیپیٹل ٹیریٹری، سندھ اور بلوچستان میں موجودہ مالی سال 2025-26 کے دوران بلدیاتی انتخابات کے انعقاد کے لیے 4.55 ارب روپے کی تکنیکی ضمنی گرانٹ طلب کی گئی تھی۔

تاہم کمیٹی نے ای سی پی کو ہدایت کی کہ وہ اخراجات کی نوعیت اور فنڈز کے متوقع استعمال کی واضح تفصیلات کے ساتھ سمری دوبارہ پیش کرے۔

اسی اجلاس میں وزارتِ داخلہ اور منشیات کی ڈویژن کی جانب سے پیش کی گئی دو علیحدہ سمریز پر غور کرتے ہوئے، ای سی سی نے کپیٹل ڈویلپمنٹ اتھارٹی (سی ڈی اے) کے ذریعے پائیدار ترقی کے اہداف ( ایس ڈی جیز) پروگرام کے منصوبوں پر عملدرآمد کے لیے 10 کروڑ روپے کی تکنیکی ضمنی گرانٹ کی منظوری بھی دی۔

کمیٹی نے موجودہ مالی سال کے دوران فرنٹیئر کور بلوچستان کی ہیلی کاپٹر کے اسپئر پارٹس کی خریداری اور معمول کے دیکھ بھال کے لیے مجاز بجٹ کے اندر 87.9 لاکھ روپے کی تکنیکی ضمنی گرانٹ کی بھی منظوری دی۔

اسی دوران ای سی سی نے وفاقی وزارتِ تعلیم و پیشہ ورانہ تربیت کی جانب سے موجودہ اسکالرشپ پروگرامز کی تسلسل کو یقینی بنانے اور نئے اقدامات شروع کرنے کے لیے 10 ارب روپے کی تکنیکی ضمنی گرانٹ کی منظوری دی، جس میں اسکیمیں بھی شامل ہیں جو اسکول نہ جانے والے بچوں کے مسئلے کو حل کرنے پر مرکوز ہوں گی۔

مزید برآں ای سی سی نے ریونیو ڈویژن کی جانب سے پاکستان کسٹمز کے قبضے میں آئے اور ریاستی ملکیت میں شامل کیے گئے دو قافلوں کے ریلیف سامان، جس میں ترپال کے خیمے اور گرم کپڑے شامل ہیں، حکومتِ گلگت بلتستان کو الاٹ کرنے کی تجویز بھی منظور کی۔ یہ امدادی سامان گلگت بلتستان ڈیزاسٹر مینجمنٹ اتھارٹی کے ذریعے ہنگامی ریلیف آپریشنز میں استعمال کیے جائیں گے۔

اجلاس میں وفاقی وزیرِ سرمایہ کاری قیصر احمد شیخ، وفاقی وزیرِ تجارت جام کمال خان، وفاقی وزیر برائے منصوبہ بندی، ترقی اور خصوصی اقدامات احسن اقبال، وفاقی وزیر برائے قومی غذائی تحفظ و تحقیق رانا تنویر حسین اور وفاقی وزیر برائے توانائی سردار اویس احمد لغاری (ورچوئل شمولیت) کے ساتھ متعلقہ وزارتوں اور ڈویژن کے سینئر حکام نے بھی شرکت کی۔