کیپکو اور فوجی سیمنٹ کا اٹک سیمنٹ کے 84 فیصد حصص مشترکہ طور پر خریدنے کا فیصلہ

اٹک سیمنٹ پاکستان لمیٹڈ (اے سی پی ایل) کی ملکیت میں بڑی تبدیلی متوقع ہے کیونکہ کوٹ ادو پاور کمپنی لمیٹڈ (کیپکو) اور فوجی سیمنٹ کمپنی لمیٹڈ نے مشترکہ طور پر اس کے 84 فیصد حصص حاصل کرنے کے لیے اقدامات شروع کر دیے ہیں۔

کیپکو نے جمعہ کو پاکستان اسٹاک ایکسچینج کو بھیجے گئے نوٹس میں اس پیش رفت سے آگاہ کیا۔

نوٹس کے مطابق 30 جنوری 2026 کو کوٹ ادو پاور کمپنی (کیپکو)، فوجی سیمنٹ کمپنی لمیٹڈ (خریداروں) اور فرعون انویسٹمنٹ گروپ لمیٹڈ ہولڈنگ ایس اے ایل (فروخت کنندہ) کے درمیان سیل اینڈ پرچیز ایگریمنٹ (ایس پی اے) طے پا گیا ہے۔ یہ معاہدہ اٹک سیمنٹ پاکستان لمیٹڈ کے کل جاری کردہ اور ادا شدہ سرمائے (کیپٹل) کے 84.06 فیصد حصے کی فروخت اور اس کے مشترکہ کنٹرول کے حوالے سے ہے۔

لین دین کی تکمیل خریداروں کی جانب سے سیکیورٹیز ایکٹ 2015 اور لسٹڈ کمپنیز (ووٹنگ شیئرز کا خاطر خواہ حصول اور ٹیک اوورز) ریگولیشنز 2017 کے تحت عوامی پیشکش (پبلک آفر) جاری کرنے، کمپنی کے شیئر ہولڈرز کی منظوری اور مسابقتی کمیشن آف پاکستان (سی سی پی) سے کلیئرنس سمیت تمام مطلوبہ کارپوریٹ اور ریگولیٹری منظوریاں حاصل کرنے، اور سودے کی تکمیل سے متعلق دیگر ضابطہ کار کی ادائیگی سے مشروط ہو گی۔

گزشتہ سال فوجی سیمنٹ کمپنی لمیٹڈ نے اعلان کیا تھا کہ اس کے بورڈ آف ڈائریکٹرز نے ’کیپکو کے ساتھ مل کر اٹک سیمنٹ پاکستان لمیٹڈ میں کنٹرولنگ اسٹیک (انتظامی حصص) حاصل کرنے کے منصوبے کی منظوری دے دی ہے۔

اس انتظام کے تحت فوجی سیمنٹ 5 کروڑ 77 لاکھ 60 ہزار عام حصص خریدے گی جو اٹک سیمنٹ کے ادا شدہ شیئر کیپیٹل کے 42.03 فیصد کے برابر ہیں، جبکہ کاپکو بھی اتنی ہی تعداد میں حصص خریدے گی جو بقیہ 42.03 فیصد کی نمائندگی کریں گے۔