ملک کے شمالی علاقوں میں کل سے ہلکی بارش اور برف باری متوقع ہے، محکمہ موسمیات

پاکستان کے محکمہ موسمیات (پی ایم ڈی) نے جمعرات کے روز کہا ہے کہ جمعہ سے شمالی بلوچستان اور ملک کے دیگر شمالی علاقوں میں ہلکی سے درمیانی بارش اور برفباری متوقع ہے۔

محکمہ موسمیات کے مطابق 30 جنوری سے ہلکی شدت والے مغربی ہوا کے دباؤ کی لہر ملک کے مغربی اور شمالی علاقوں تک پہنچنے کا امکان ہے، جو 3 فروری تک برقرار رہ سکتی ہے۔

اس موسمی نظام کے زیر اثر گلگت بلتستان کے دیامر، استور، غذر، اسکردو، ہنزہ، گلگت، گوانچے اور شگر کے اضلاع، آزاد جموں و کشمیر کی وادی نیلم، بالاکوٹ اور بالائی علاقوں میں موسم جزوی طور پر ابر آلود رہنے کے ساتھ ہلکی سے درمیانی بارش اور پہاڑوں پر ہلکی سے درمیانی برف باری کا امکان ہے۔

خیبرپختونخوا کے بعض علاقوں بشمول چترال، دیر، سوات، کالام، شانگلہ، کوہستان، بونیر، بٹگرام، مانسہرہ، ایبٹ آباد، ہری پور، مردان، پشاور، کوہاٹ، کرم اور وزیرستان میں 31 جنوری سے 2 فروری تک وقفے وقفے سے بارش یا برفباری متوقع ہے۔

اسلام آباد، پوٹھوہار ریجن، سیالکوٹ، نارووال، گجرات، گوجرانوالہ اور گردونواح میں یکم سے 3 فروری تک کبھی کبھار ہلکی بارش کا امکان ہے، جبکہ مری، گلیات اور گردونواح میں بھی ہلکی بارش اور برفباری متوقع ہے۔

پی ایم ڈی کے مطابق 31 جنوری سے یکم فروری تک بلوچستان کے شمالی علاقوں، بشمول کوئٹہ، زیارت، ژوب، چمن، پشین، قلعہ عبداللہ، قلعہ سیف اللہ، نوشکی اور ہرنائی میں ہلکی سے درمیانی بارش اور برفباری کا امکان ہے۔

محکمہ موسمیات نے خبردار کیا ہے کہ ناران، کاغان، دیر، سوات، کالام، چترال، کوہستان، مانسہرہ، شانگلہ، استور، ہنزہ، اسکردو، وادی نیلم، مظفرآباد، پونچھ، ہٹیاں، باغ اور حویلیاں میں یکم فروری کے دوران، اور کوئٹہ، قلات، چمن، قلعہ عبداللہ، قلعہ سیف اللہ، نوشکی، ہرنائی اور ژوب میں 31 جنوری سے یکم فروری تک برف باری کے باعث پھسلن کا خطرہ رہ سکتا ہے۔

پی ایم ڈی نے مزید کہا ہے کہ بالائی خیبر پختونخوا، گلگت بلتستان اور کشمیر کے پہاڑی علاقوں میں لینڈ سلائیڈنگ اور برفانی تودے گرنے کا امکان ہے، اور سیاحوں کو محتاط رہنے اور غیر ضروری سفر سے گریز کرنے کی ہدایت کی گئی ہے۔

مزید برآں، اس دوران دن کے وقت درجہ حرارت میں کمی متوقع ہے۔