پاکستان نے غزہ بورڈ آف پیس میں شمولیت کے لیے ٹرمپ کی دعوت قبول کر لی، دفتر خارجہ

دفترِ خارجہ نے اعلان کیا ہے کہ پاکستان نے غزہ میں پائیدار امن کی حمایت کے مقصد کے تحت بورڈ آف پیس (بی او پی) میں شمولیت کی دعوت قبول کر لی ہے۔ بیان کے مطابق یہ دعوت امریکی صدر ڈونلڈ جے ٹرمپ کی جانب سے وزیراعظم محمد شہباز شریف کو دی گئی تھی۔ پاکستان نے بورڈ آف پیس میں شمولیت کا فیصلہ اقوام متحدہ کی سلامتی کونسل کی قرارداد نمبر 2803 کے تحت غزہ امن منصوبے پر عملدرآمد کی جاری کوششوں کے حصے کے طور پر کیا ہے۔

پاکستان نے اس امید کا اظہار کیا ہے کہ اس بورڈ کا قیام غزہ میں مستقل جنگ بندی، فلسطینیوں کے لیے انسانی ہمدردی کی بنیاد پر امداد میں بڑے پیمانے پر اضافے اور جنگ زدہ علاقے کی تعمیرِ نو کے لیے ٹھوس اقدامات کا باعث بنے گا۔

اعلامیے میں مزید کہا گیا کہ پاکستان کو توقع ہے کہ یہ اقدام بین الاقوامی قوانین اور اقوام متحدہ کی متعلقہ قراردادوں کے مطابق ایک معتبر اور وقت کے تعین کے ساتھ جڑے سیاسی عمل کے ذریعے فلسطینی عوام کے حقِ خودارادیت کے حصول میں مددگار ثابت ہوگا۔

پاکستان نے ایک بار پھر 1967 سے پہلے کی سرحدوں پر مبنی ایک آزاد، خودمختار اور متصل فلسطینی ریاست کے قیام کی حمایت کا اعادہ کیا ہے، جس کا دارالحکومت القدس الشریف ہو۔ پاکستان نے ان مقاصد کے حصول اور فلسطینی عوام کے دکھوں کے خاتمے کے لیے بورڈ آف پیس کے رکن کی حیثیت سے اپنا مثبت اور تعمیری کردار ادا کرنے کے عزم کا اظہار کیا ہے۔